Республикыштына идалык мучаш марте шуко пачеран кум пӧртым чоҥен шуктат да тушко аварийный илыме верла гыч 500 утла еҥым кусарат.
10 ноябрьыште Марий Элым вуйлатыше Юрий Зайцев Россий Федерацийыште Регионлам вияҥдыме шотышто правительственный комиссийын президиумжын заседанийыштыже участвоватлен. Тудым Россий правительстве председательын алмаштышыже Марат Хуснуллин видеоконференцкыл режимыште эртарен.
Заседанийыште корным чоҥымо, калыкым у пӧртлашке илаш пуртымо да моло йодышым онченыт.
Марий Элыште «Лӱдыкшыдымӧ да сай качестван автомобиль корно» национальный проектын «Регионысо да верысе корно сеть» регионысо проектшым 2022 ийыште илышыш пуртымо кышкарыште ыштыме ойпидышым тӱрыснек шуктымо. Йошкар-Ола кундемыште верысе кӱлешлыкан автомобиль корнылам олмыктымо да чоҥымо шотыштат ойпидышым тичмашнек ыштыме.
«Регионысо да верысе корно сеть» регионысо проектын кышкарыштыже регионысо, муниципалитет-влак кокласе да верысе автомобиль корнылаште искусственный сооружений-влакым нормылан келыштарыме пашат ойпидышлаште палемдыме почешак шукталтеш.
2023 ийлан олмыкташ да чоҥаш палемдыме чыла 59 объектлан ойпидышым ыштыме.
Тений регионысо кӱлешлыкан автомобиль корнын 23 объектыштыже да Йошкар-Ола воктенысе верысе кӱлешлыкан автомобиль корнын 19 объектыштыже олмыктымо пашам мучашлыме. Чумыржо 185 км утла кужыт корным, ты шотыштак Йошкар-Олаште 19,6 км кужыт урем-корно сетьым, да 11 кӱварым олмыктымо.
«Ял кумдыкым комплексно вияҥдымаш» кугыжаныш программым илышыш пуртымо кышкарыште Морко районышто Курыкӱмбал (1,8 км) да Шлань (2,4 км) яллашке шуйналтше корнылам чоҥымо. Чыла пашам 2 ноябрьыште пытарыме.
«Илаш йӧрдымӧ илыме фондым иземдымаш» федеральный проектым илышыш пуртымо кышкарыште тений аварийный илыме верла гыч граждан-влакым программын III да IV йыжыҥже почеш кусарыме. 8 ноябрьлан налмаште 53 тӱжем утла квадрат метр аварийный илыме верым кораҥдыме, 3559 еҥым у пӧртыш кусарыме.
Идалык мучаш марте шуко пачеран кум пӧртым чоҥен пытараш да тушто 561 еҥым илаш пурташ ситыше 199 пачерым налаш палемдыме.
Целевой показатель-влак тичмашнек шуктымо лийыт.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
