Марий Эл вуйлатышын пашажым жаплан шуктышо Юрий Зайцев 19 августышто Курыкмарий районышто да Козьмодемьянск олаште пашаче визит дене лийын.
Причалым чоҥымек, турист-влак ешаралтыт
Республикын социально-экономический вияҥмаш индивидуальный программыж дене келшышын, Козьмодемьянскын йӱдвел ужашыштыже, Юлын пурла серыштыже причал пырдыж чоҥалтеш. Тӱҥалтыш акше 232 миллион теҥге лийын гын, кызыт финансированийым кугемдыме йодыш ончалтеш. Марий Эл вуйлатышын пашажым жаплан шуктышо Юрий Зайцевын объектым ончен савырнымыж годым Козьмодемьянск олан мэрже Михаил Козлов умылтарен: «Кеҥежым мемнан олашке 200 утла гана теплоход-влак толедат. Кажныже 150 утла еҥым конда. Причал пырдыж укелан кӧра кугу теплоход-влак пурен огыт керт». Марий Элын транспорт да корно озанлык министржын алмаштышыже Елена Кузнецован мутшо почеш, объектым 2023 ийыште чоҥен шуктышаш улыт. Кужытшо – 95 м, лопкытшо – 24 м.
Козьмодемьянск турист ола веле огыл, а эркын-эркын судным чоҥышо олашке савырна, «Паллада» парус клубын мастерскойжылан у оралте чоҥалтеш. Мэр М.Козлов Президент фондын грантше дене ыштыме «Марий Элын йоча флотилийже» клуб, тудын вуйлатышыже Андрей Желудкин, шушаш ийыште 140 еҥым авалтыше «Инфосфера» IT-школ почылтмо нерген каласкален.
Л.СЕМЕНОВА ямдылен
Д.РЕЧКИНЫН фотожо
