Тыге каласен Марий Эл вуйлатышын пашажым жаплан шуктышо Юрий Зайцев Йошкар-Олан мэрже Евгений Маслов дене вашлиймыж годым. Палемден: соцсетьлаште еҥ-влак утларакшым оласе кудывечылаште корно шартышын йӧрдымыш лекмыж шотышто вуйым шийыт.
«ВКонтакте» да Телеграм воткылласе аккаунтыштем шукын тидын нерген возат. Тыланда оласе шуко пачеран пӧрт-влак коклаште да частный секторышто лекше ты йодышым поснак тӱткын ончалаш темлем. Раш, чылажымат иканаште да вигак тӧрлаш ок лий, но ыштыман», – каласен Ю.Зайцев.
«Лӱдыкшыдымӧ сай качестван корно» нацпроектым илышыш шыҥдарыме жапыште 30 килметр утла корным тӧрлымӧ. Тений ты проект почешак корно сетьын 15 участкыштыже 15,3 километрым олмыкташ палемдыме, акше 396 миллион теҥгеш шуэш, каласен Евгений Маслов. «Чын, Йошкар-Оласе кудывече кумдыклаште ятыр школ, йочасад, больнице, аптеке да моло социальный учреждений-влак верланеныт. Нунын йыр тӱзатыман», – палемден тудо.
Вӱдым налме верым чоҥымо шумлык йодышлан мэр вашештен: калыклан яндар вӱдым ситараш 16 у скважиным кӱнчыман. Школышто тунемме верым ямдылыме йодышат лектын. Масловын мутшо почеш, 2024 ий марте кок школым чоҥаш палемдыме: концессионный ойпидыш негызеш «Юбилейный» микрорайонышто – 825 вераным да «Восточный» микрорайонышто – 1100 вераным. Но «Юбилейный» микрорайонысо школым чоҥымо срок пудырталтеш, сандене ты йодышым Юрий Зайцев контрольышто кучаш сӧрен.
Л.СЕМЕНОВА
Д.Речкинын фотожо
