Марий Эл вуйлатыше Китайыш миен коштмыж деч вара Российысе микроэлектронный продукцийым лукшо-влак дене вашлийын, нунын коклаште ваш мутланымаш эртен. Вашлиймаште тыгак Федераций Совет председательын алмаштышыже Константин Косачев лийын.
Делегаций дене Китай Калык Республикын провинцийлаштыже лийме годым мом кутырен келшымым каҥашеныт. Марий Эл вуйлатыше йот элысе коллегыж-влак деч кондымо презентаций материалым кучыктен, партнёр-влаклан могай продукций келшыме нерген каласкален.
«Валентина Ивановна Матвиенкон вуйлатыме делегаций дене пырля Китай Калык Республикыште кугу паша ышталтын. Лектын коштмо деч ончыч Шанхай территорийыште улшо консульствыште, посольствышто каҥашыме йодыш-влакым шотыш налынна. Мемнан предприятий-влаклан мо пайдам кондымым умылен вашлиймаш-влакым эртарыме. Икмыняр компаний шкеж деке ӱжын. Нуно виян структурлан шотлалтыт, икмынярже кугыжаныш дене кылдалтын. Тӱҥжӧ – мемнан дене иквереш пашам ышташ ямде улыт», – палемден Юрий Зайцев.
Федераций Совет председательын алмаштышыже Китайыш визитым келшен пашам ыштымашым умбакыже кумдаҥдымаште пеш кӱлешан ошкыллан шотлен.
«Тиде икымше ошкыл. Ме кызыт шкешотан координат-влак сеткыш (радамыш) логалынна да умылена: китай бизнесат тыштак да нуныланат тиде кӱлешан. Ончыкыжым мом ме ышташ тӱҥалына, чылажат визит годым кутырен келшыме ойпидышлан эҥерташ тӱҥалеш», – каласен Константин Косачев.
Китай предприниматель-влак делегацийнан толын коштмыжым пеш серьёзныйлан шотленыт, бизнес кӱкшытыштӧ пырля пашам ышташ кумылан улыт, ешарен сенатор.
Российысе компаний-влакын вуйлатышышт Китай гыч партнёр-влак дене умбакыже кузе пашам ыштыме, могай поставщик-влак дене вашкылым кучымо нерген каҥашеныт.
«Вашлиймашлан тау. Вашлиймаш пеш шергакан, молан манаш гын, вийнам иктеш ушен гына ме шкенан задачына-влакым шуктен кертына. Марий Эл вуйлатышын вашлиймашке толмыжо эшеат шергакан», – палемден ик участник.
Марий Эл Республикым вуйлатышын администрацийжын
информаций паша пӧлкан уверже негызеш
Л.СЕМЕНОВА ямдылен
