Марий Эл правительстве пеленсе Правонарушений лиймым шижтарыме шотышто межведомственный комиссийын черетан заседанийже лийын.
Тудын пашашкыже республик вуйлатышын администрацийжын, исполнительный кучем орган-влакын, верысе самоуправленийын, ведомство-влакын еҥышт ушненыт.
Марий Элысе элгӧргӧ паша министерствын полиций начальникшын алмаштышыже Михаил Плотников, республикысе Гражданский обороно ден калыкым аралыме комитет председатель Александр Малкин кундемыштына правопорядке могай улмо, правам аралыше орган-влакын правонарушений лиймым шижтарыме шотышто могай мерым ыштымышт, тыгак «Марий Эл Республик кумдыкышто 2017-2025 ийлалан правонарушений профилактике» кугыжаныш программым республикыштына кузе илышыш пуртымо нерген ойленыт.
Комиссийын еҥже-влак неле илыш ситуацийыште улшо икшыве-влакын кеҥеж жапыште канышышт да тазалыкыштым пеҥгыдемдыме дене кылдалтше улшо йодыш-влакым, тӱрлӧ сынан профилактике учетышто шогышо ийготыш шудымо-шамычын кеҥеж канышышт, тазалыкыштым пеҥгыдемдыме да нунылан пашам ышташ йӧным пуымо нерген мутланеныт.
Тиде заседанийыштак Курыкмарий муниципал район администрацийын правонарушений лиймым шижтарыме шотышто пашам кузе шуктымыж нерген йодышым онченыт.
Заседанийыште правонарушений лийын кертмым шижтарыме системысе учреждений ден орган-влакын пашаштым саемдаш, тений кеҥежым йоча-влакын канышышт кӱлеш семын эртыже манын ыштышаш паша ден мероприятий-влакым палемденыт.
Марий Эл вуйлатышын пресс-службыжын уверже негызеш Л.Камалетдинова ямдылен
