УВЕР ЙОГЫН

Палемдымым шукташ гына кодеш

Марий Элысе коммерческий огыл организаций-влаклан социальный пашам шукташышт республикын бюджетше гыч субсидийым ойырымо кокымшо конкурсым иктешлыме.  

Тудо кум направлений дене эртен. Кажныжлан 200 тӱжем теҥгем ойырымо.

Комиссийыш чылаже 16 йодмаш пурен, но Марий Эл правительствын социальный пашам шуктышо коммерческий огыл организаций-влаклан полшымо йодыш нерген пунчалже дене келшышын, конкурсыш латкумытшым веле налме.

Конкурс комиссийын пунчалже почеш, «Инвалид-влакын да нунын ешыштын социальный адаптацийышт» номинацийыште  икымше верыш инвалид йочан да 18 ий деч кугурак ийготан шочынак инвалидан еш-влаклан полшымо «Волжск олан ончыкылыкан йочаже» ача-ава-влакын верысе мер организацийышт «#СемьяКакСемья» проектышт дене лектын. Субсидийын кугытшо – 100 тӱжем теҥге. Кокымшо верым Марий Элын «Инвалид-влакын всероссийский обществышт» общероссийский мер организацийжын региональный организацийже «Мемнан тӱняна» проектше дене налын. Субсидийын кугытшо – 60 тӱжем теҥге. Кумшо верыш «Сокыр-влакын всероссийский Трудовой Йошкар Знамя обществышт» инвалид-влакын общероссийский мер организацийыштын Марий республиканский организацийжын «Инвалид-влакын Марий республиканский культур-спорт реабилитаций рӱдерышт» частный тӧнежше «Ӱстембал модыш – реабилитаций йӧн» проектше дене лектын. Субсидийын кугытшо – 40 тӱжем теҥге.   

«Россий Федерацийыште наций-влак кокласе кылым вияҥдымаш, калык-влакын йылмыштым, тӱвыраштым, йӱлаштым арален кодымаш да арален шогымаш» номинацийыште икымше верым «Россий ӱдырамаш-влакын ушемышт» общероссийский мер-кугыжаныш организацийын Марий региональный пӧлкажлан «Живица» тичмаш форматан любительский клубым ыштымаш» проектшылан пуымо. Кокымшо вер Марий Элын «Вийар» культур-влак кокласе кыл обществе» мер организацийжылан логалын. (Самырык автор-влаклан «Кеҥеж сылнымутчо-2020» сылнымут семинарым эртараш 60 тӱжем теҥгем ойырымо). Кумшо верым Марий Элыште самырык-влакын тӱҥалтышыштлан полшымо «Тукым» мер организацийлан «Еш – тиде Россий» проектшым илышыш пурташ пуымо.

«Поро кумыл паша, тыгак Россий Федерацийын гражданже-влакым патриотизм, ты шотыштак военно-патриотический шӱлышеш куштымо паша» номинацийыште икымше верым «Десантник-влакын ушемышт» регион-влак кокласе мер организацийын Марий региональный пӧлкаже «Шарнымаш» мероприятий комплекс» проектше дене налын, кокымшо верым – «Йошкар-Оласе йоча ден подростко-влакын «Шонанпыл» ушемышт»  регион-влак кокласе организацийын Марий региональный пӧлкаже «Сеҥымашын наследникше-влак» проектше дене, кумшо верым – «Россий военно-исторический обществе» общероссийский мер-кугыжаныш организацийын Марий региональный пӧлкаже «Мемнан азбукна» проектше дене.

М.ИВАНОВА

Опубликовать в Одноклассники

Добавить комментарий