Йошкар-Олаште Россий МВД виктемын пашаеҥже, полиций капитан Павел Полушин Преподобный Серафим Саровскийын храмже пеленысе рушарня школын кыдалаш да кугурак группылашкышт коштшо-влаклан «Патырлык урокым» эртарен.
Пӧръеҥ шкеже – боевой действийын ветеранже, Йӱдвел Кавказыште контртеррористический операцийын участникше. Адакшым полицийыште пашам ыштымыж деч посна каратэ секцийым вуйлата.
Мо тыгай лӱддымылык, подвиг, патриотизм, героизм? Павел Полушин йоча-влаклан умылтарен, тачысе жапын талешкышт нерген ойлен, а пырля нуно Российын Геройжо-шамычым ушештареныт. Ӱдыр-рвезе-влак уналан шуко йодышым пуэныт, а уэш тыгай вашлиймашым ончыкыжым Йошкар-Олаште Россий МВД-н виктемыштыже эртараш палемденыт.
Г.Кожевникова
