Марий Эл гыч спортсмен-влак Коми Республикыште ече дене всероссийский таҥасымаште вийыштым тергат.
Икымше стартыште эрыкан йӧн дене ӱдыр-влак 5 километрым, а рвезе-шамыч 10 километрым куржыныт. Тушто «Виктория» СШОР-ын воспитанникше-влак Диана Журавлёва (37-ше вер) ден Иван Шикин (44-ше вер) ойыртемалтыныт.
***
Саранскыште иймаш дене всероссийский таҥасымаште Марий Эл гыч Арина Керженева кумшо верыш лектын.
Спортсмен 200 метрым баттерфляй йӧн дене ийын эртен.
Тренерже Александр Сысуев ден когыньыштым шокшын саламлена.
***
Испанийыште мини-футбол дене эртыше тӱнямбал чемпионатыште Марий Эл гыч паралимпийский резерв спортивно-адаптивный школын спортсменже-влак Никита Гаврильченко дене Николай Богатырёв (тренерышт – Леонид Решетов) элнан сборныйжо дене пырля ший призёр лийыныт.
***
Эртыше кечылаште Новочебоксарскыште Совет Союз Герой Н.М.Дудецкийым шарныме лӱмеш куштылго атлетике дене турнир эртен.
Марий Эл гыч куштылго атлетике дене спортшколын воспитанникше-влак кокла гыч Степан Парсаев чаракым сеҥен куржмаште (60 м.) 1-ше, Елизавета Лыскова чаракым сеҥен куржмаште (2000 м.) 1-ше, Илья Крылов ты кужытыштак 3-шо, Артём Лаптев кӱкшытыш тӧрштылмаште 3-шо, тудак чаракым сеҥен куржмаште (60 м.) 3-шо лийыныт.
