9 октябрьыште Марий самырык театрыште Зинаида Долгован пьесыж почеш шындыме «Лаюкай агур» спектакльын премьерже лиеш. Тушто Ансылын рольжым самырык артист Андрей АЛЕКСЕЕВ модаш тӱҥалеш.
Параньга район Ондропсола ялын эргыжлан артист лияш кӧ кумылаҥден? Могай спектакльлаште модеш? Нине да моло нерген шкеж дене вашмутланымашым лудаш темлена.
– Андрей, койыш-шоктыш дене могайрак икшыве кушкынат?
– Изинекак усталык шӱлышан лийынам. Икымше класс гычак верысе тӱвыра пӧрт пеленысе «Поро эр» ансамбльыш кошташ тӱҥалынам. Коллектив вуйлатыше Эрик Васильевич Смирнов Ермучаш тӱҥалтыш школышто музык урокым вӱден да тудак мемнам, изи падыраш-шамычым, кушташ туныктен. Кушмо семын «Поро кас» ансамбльын участникше лийынна.
– Тугеже сценыш парт коклаште шинчыме годымак лекташ тӱҥалынат?
– Туге. Концертым шкенан дене веле огыл ончыктенна, вес районлашкат, тыгак Татарстанышкат лектын коштынна. Тусо Арск район дене мемнан Параньга район «Келшымаш тулотым» эртара, садлан икте-весе деке мастарлыкым ончыкташ кажне ийын кудалыштынна.
– Артист лияш шонымашет кунамрак шочын?
– Матародо школышто латикымше классыште тунемме годым ансамбльлан кумло ий темме лӱмеш эртарыме концертыште Геннадий Филимонович Гордеев лийын улмаш. Тудак артистлан тунемаш пурымо нерген каласкален. Темлымашыжым шотыш налынам да Палантай лӱмеш тӱвыра да сымыктыш колледжыш экзаменым кучаш толынам, лӱмынак почеламутым, басне гыч ужашым лудаш, этюдым ямдыленам. Комиссий ончылно мастарлыкым ончыкташ да Олег Геннадьевич Иркабаевын театр илыш, артистын пашаж нерген мутланымыже келшен, садлан артист лияш шонымаш трукышто чоным ырыктен.
– А такшым шкеже кушко тунемаш пураш ямдылалтынат ыле?
– Школ деч вара армийыш каяш да контракт почеш службыш кодаш шоненам. Но, калыкыште манымла, чылажат – Юмын кидыште. Студент радамыш ушнен шуктышым ма уке, армийыш каяш повестке толын, вет тудо жапыште сузыш тунемаш пурышылан армий деч отсрочко лийын огыл.
– Армий деч вара театрыш толмо шотышто шонымаш вашталтын огыл?
!!! Интервьюм тичмашнек 7 октябрьыште лекше «Марий Эл» газетыште лудаш темлена
АЛЕВТИНА БАЙКОВА
Фотом еш альбом гыч налме
