Йошкар-Олаште Республикысе изосымыктыш тоштерыште «Вятка в цвете» ончер почылтын.
Тушто Виче кундемысе сӱретче-влакын графикыштым, живопись сынан радынаштым, калык кидмастар-влакын дымковский модышыштым, гобеленыштым, керамике пашаштым чумырымо.
– Кажне радынаште Виче кундемыште илыше калыкым, сылне пӱртӱсшым ужаш лиеш. Тыгодым, радынам, паша-влакым шымлен, шке нерген, илышын тӱрлӧ шӧрынан ойыртемже нерген шоналташ йӧн уло, – каласен ончерым почмо годым Марий Элын тӱвыра, печать да калык-влакын пашашт шотышто министрын алмаштышыже Игорь Садовин.
Виче художник-влакын ушемыштым вуйлатыше, Аркадий Рылов лӱмеш художественный училищын туныктышыжо Игорь Сметанин Йошкар-Ола нерген ятыр поро шомакым ойлен.
– Олада пеш мотор. Тышке икымше гана толынам, мылам чылажат келша, поснак – поро кумылан калыкше. «Вятка в цвете» ончерыш чумырымо пашалаште Виче кундемын илышыже ончыкталтеш. Ӱшанем, ончыкыжым ончерна кумдаҥеш, мемнан деке утларак художник ушна, – манын Игорь Сметанин.
Ончерыште марий сӱретче-шамычынат пашаштым ужаш лиеш. Мутлан, Николай Кузьмич Ендальцевын «Пугачев – Элнетыште» радынаже ик ончыл радамыште кеча. Ты паша ожнысо жапыш пӧртылта.
Вес кундемысе сӱретче-шамычынат пашашт ойыртемалтше улыт. Теве сӱретче Василий Ифановын «Как вятские толокно прямо из проруби хлебали» радынаже мыскара сынан. Нелли Зубареван гобелен гыч ыштыме «Морская нимфа» пашаже-влак кумылым нӧлтат. Икманаш, ончерыш мийыше шкаланже келшыше пашам ойырен, тудым ятыр жап ончен, шымлен да шкаланже шуко ум муын кертеш.
Михаил СКОБЕЛЕВ, Лидия ШАБДАРОВА
Снимкыште: Национальный художественный галерейын да изосымыктыш тоштерын директоржо Елена Бурнашева Игорь Сметанинлан книгам кучыкта.
Михаил Скобелевын фотожо
