Элым аралышын идалыкше жапыште «Герой нашего времени» проект илышыш пурталтеш.
Тудын дене келшышын, кодшо кечылаште Мер полыш штабыште Кугыжаныш автоинспекций пашаеҥ Фёдор Сметанин рӱдоласе 29-ше ден 32-шо №-ан школлаште луымшо классыште тунемше-влак дене вашлийын.
Тидлан амалым ик ойыртемалтше сӱрет ыштен. Тудо сусыргышо пӧръеҥым автобус остановко марте нумал наҥгаен. Тидым ик самырык еҥ телефонышкыжо сниматлен да интернетыш вераҥден. Кӱчык жапыште видеом икмыняр миллион еҥ ончен.
Инспекторын ойлымыж почеш, тудо шкенжым геройлан огеш шотло, а нелылыкыш логалше еҥлан полшенам, ойла.
Марий Эл Кугыжаныш Погын председатель Михаил Васютинын кӱштымыж почеш икымше алмаштышыже Лариса Яковлева Фёдор Артемович Сметанинлан Марий Эл Кугыжаныш Погынын тауштымашыжым кучыктен.
Марий Элысе МВД-н Кугыжаныш автоинспекцийжын ДПС-шын отдельный спецбатальонжын инспекторжо Фёдор Сметанин вашлиймаште пашаже, корно-патруль службо инспекторын полицийын вес подразделенийласе пашаеҥже-влак деч мо дене ойыртемалтмыж, моло нерген каласкален. Йоча-влакат автоинспекцийын историйже, службын условийже, физический, боевой да служебный ямдылалтмаш нерген йодыштыныт.
Мероприятийын организаторжо Марий Элыште «Российысе калык-влакын ассамблейышт» общероссийский мер-кугыжаныш организацийын регионысо отделенийжын председательже Лариса Яковлева лийын. Тудын ойлымыж почеш, ончыкыжым тыгай вашлиймашым тунемше-влак дене веле огыл, студент-шамыч денат идалык мучко эртараш палемдалтеш. «Герои нашего времени» проектым илышыш шыҥдарымаш тунемше-влаклан мемнан илышна ласка лийже, лӱдыкшыдымылыкым эскерымаште шочмо элнан чын патриотшо-влак кече гыч кечыш лым лийде тыршат манын пален налашышт полша.
Любовь Камалетдинова
Фотом республикысе МВД-н пресс-службыж гыч налме
