Марий кугыжаныш университетыште «Чылажат Сеҥымаш верч! МарГУ: тукым-влак кокласе кыл» тӱнямбал кӱкшытан II форумышто «Знание» Россий обществын лекторжо, Россий Федераций Общественный палатын еҥже Роман Золотухин волонтёрство да специальный военный операцийлан полышын рольжо нерген каласкален.
Тудын палемдымыж почеш, фронтын линийыштыже, кредалмаш кайыме кундемлаште шуко еҥ уло, коклаштышт – йоча, инвалид да сулен налме канышыште улшо-влак. Нуным лӱдыкшыдымӧ верыш лукташ манын, Роман Золотухинлан уэш КАМАЗ-ым виктарен моштымыжым шарналташ логалын. Тудын мутшо почеш, тӱжвач ончымаште селалаште пуйто илышыжат уке, но гуманитарный полышан – кочкышым оптыман 800 коробкам намиеныт) – экипаж деке тӱжемат пеле наре еҥ лектын шогалын.
«Кунам ешыште улшо кажне еҥлан ик корбка дене пуэденна, черет иземын огыл. Умылышым: тышке эше пӧртылам. Донецкыште кум тылзе иленам, волонтёр семын пашам ыштенам. Ме тушман деч утарыме кундемлаште кудалыштынна, гуманитар полышым пуэденна. Мариупольышто лийынна, тушто спонсор-влакын полшымышт дене кинде-булкым ыштен лукмо пашам ворандаренна да оласе уремлаште кажне кечын 3000 дене булкым яра пуэденна. Тыгак вӱдан ате-шамычым вераҥдылынна. Калык фронт Сибирь гыч вӱдым шупшыкташ техникым налын конден. Водитель-шамычым муын, вӱдым шупшыктенна. А вӱд тушто – шӧртньӧ гай, кечыжат июнь-июль тылзылаште кече ик эн шокшо», – шарналтен Роман Золотухин.
Вашлиймаш годым тудо тыгак гуманитарный миссийыш кузе ушнымо, волонтёр лийме шотышто палдарен.
Фотом «Знание» Россий обществын пресс-службыж гыч налме
