Сосновый Бор поселко кундемыште ынде икмыняр кече шучко пожар озалана.
20 августышто Марий Эл вуйлатыше Александр Евстифеев ты верыш уэш миен да оперативный штабын еҥже-влак дене совещанийым эртарен, тыгак журналист-влак дене мутланен.
Республик вуйлатыше палемден: кызыт илыме вер-влаклан лӱдыкшӧ уке, туге гынат ситуаций алят неле.
– Йӱлен кертше кумдык кызыт шукемеш. Тидыже чот шокшо да мардежан улмо дене кылдалтеш. Нине амалак тулым йӧрташ чаракым ыштат, – палемден Александр Евстифеев.
Тыгак палдарен:
– Эрла Юл кундем федерал округышто кугу мероприятий лиеш – Нижний Новгород олалан 800 ий темме палемдалташ тӱҥалеш. Мутат уке, тушко ушнаш мый тореш лийынам. Кызыт мемнан ик эн кугу паша гына – пожарым тӱрыс сеҥымаш. Ме сутка мучко пашам ыштена. Теҥгече 2 вертолет лийын, таче – 4. Нуно тулым тӱрыс йӧртымешке пашам ышташ тӱҥалыт. Доброволец-влак тӱшка дене толыт. Тыгак пошкудына-влак деч – Киров область гыч – 30 пожарный ден ешартыш 8 технике полшаш толыныт. Проблемым решатлышашлан ме еҥ-влакымат да техникымат утларак ушаш тыршена.
Вара тудо доброволец-влак дене мутланен, нунылан таум ойлен да ме садак туткарым сеҥена манын ӱшанен каласен.
Умбакыже Александр Евстифеев Студенка поселкышто лийын да паша кузе кайымым аклен.
* * *
А эрлашыжым, 21 августышто, тудо кодшо йӱдым Киров область гыч полшаш толшо-влак дене вашлийын мутланен.
Тиде кечынак кас велеш Александр Евстифеев Сосновый Бор поселкышто оперативный штабын еҥже-влак дене совещанийым эртарен. Тушто паша кузе кайымым каҥашеныт.
– Таче волонтер ден моло полышкалыше-влак икмыняр пачашлан ешаралтыныт. Нуно чыланат уло вийыштым пыштен тыршат. Ме смене дене ыштыме графикыш куснена, молан манаш гын 12 шагат физически чыташ огеш лий. Кокла шот дене 6 шагат дене пашам ыштыман. Таче тыгак сонар сезон почылтмашым жаплан чактаренна, – каласен Александр Евстифеев.
* * *
22 августышто эрдене регион вуйлатыше адакат Сосновый Бор поселкыш миен да тушто оперативный штабын еҥже-влак дене улшо ситуацийым каҥашен, тыгак пожарым йӧрташ толшо доброволец-влак дене мутланен.
– Таче тулым йӧрташ тале мардеж адакат чаракым ышта. А молыжым чыла келшышын шуктымо: еҥ-влак верыште улыт, мо кӱлешым ситарыме, – каласен тудо да ешарен:
– Шукын полшаш тыршат: кочкыш йӧрварым темлат, пожарым йӧрташ средствам налмашке ушнат. Еҥ-влак шкеныштым чот келшыше команде семын ончыктат. Тидыже куандара да ӱшаным шочыкта.
Тиде кечынак кастене Александр Евстифеев Сосновый Бор поселкышто уэш оперативный штабын совещанийжым эртарен.
Тушто палдареныт: кодшо кастене 65 гектар кумдыкышто тул озаланен гын, тиде кечын каслан йӱлымӧ кумдыкым 54 гектар марте иземден кертыныт. У верыште пожар ылыжын огыл, илыме вер-влаклан лӱдыкшӧ уке.
– Теҥгече йӱлымӧ верлашке вертолет-влак 200 тонн вӱдым ястареныт гын, таче – 405 тонным. Бульдозер-влак ситышын улыт. Еҥ-влак чылаже 1000 рюкзак гыч вӱдым шыжыктат. Умбакыжат кочкышым чылаштлан ситарыман, – каласен республик вуйлатыше.
Совещанийыштак Александр Евстифеев соцкыллаште оксам погымо нерген увертарымаш-влак шотышто поснак палемден: пожарный ден доброволец-влаклан окса ойыралтын, а тыгай ӱжмаш-влак мошенник-шамычын «пашашт» лийын кертеш.
– Окса республикын правительствыжын резерв фондшо, Медведево район администраций да Йошкар-Олан мэрийже гыч ойыралтеш. Оксам погымын кӱлешлыкше уке. Сандене мый тендам йодам: шкендам ондалаш ида пу, – ойлен Александр Евстифеев.
Тудо еҥ-влакын полышым пуымыштлан тауштен да ешарен: вашке локтылалт кертше да лӱмын ямдылаш кӱлшӧ кочкышым кондымо огеш кӱл. Тидыже пожарым йӧртымаште тыршыше-влакын тазалыкыштлан эҥгекым ыштен кертеш.
Тыгак республик вуйлатыше палемден: пожарым йӧртымеке, кодшо кочкыш йӧрварым илалше-влаклан интернат-пӧртлашке, Самырык-влакын «Авангард» военно-патриотический воспитаний рӱдерышкышт да социальный учрежденийлашке намиен пуат.
Марий Эл вуйлатыше еҥ-влакын полшаш ямде да икоян улмыштым ончыктымыштлан эше ик гана тауштен:
– Марий Эл Республикыште илыше калык шкенжым ик команде семын ончыктен. Кузе еҥ-влак шкеныштым кученыт да полшаш тыршеныт – тиде моткочак сай.
Тудо ешарен: республикын правительствыже тӱшка задачым писын решатлаш ямдылалтын.
– Ме лектышым ужына. Ситыдымаш-влакат лийын каят, молан манаш гын паша шуко. Мылам ойлат: кодшо гана, кунам кугу пожар лийын, тудым кок тылзе йӧртеныт. Тиде – тул дене кучедалме мемнан корно огыл, – каласен пытартышлан Александр Евстифеев.
* * *
Теҥгече эрдене, 23 августышто, Александр Евстифеев моло кечылаште семынак адакат пожарым йӧртымаште тыршыше доброволец-влак дене мутланен:
– Пагалыме доброволец-влак, мемнан аклаш лийдыме полшышына-влак. Мый тендам палдарынем: паша план дене келшышын шукталтеш, кеч улшо сӱрет эше кугу тӱткышым йодеш. Таче тыгак ныл вертолет пашам ышташ тӱҥалеш. Икте-весыдам эреак шинча ончылно кучыза, сусыргымо деч шекланыза. Чылажымат кӱлеш семын организоватлыме. Иктаж ситыдымаш вашлиялтеш гын, вигак вуйлатышылан увертарыза. Лишыл жапыште ме тендан дене тиде ситуацийым мучашлышаш улына. Тау тыланда.
Рушарня кас гыч шочмо эр марте сӱрет вашталтын огыл. Тул тыгак 54 гектарыште озалана. Тӱҥ вий ден средства Куяр ден Устье-Кундыш лессничествыла кумдышто верланыше илемлам аралаш да йӱлышӧ верлам пытараш виктаралтыныт. Паша ончычсо семынак сутка мучко шукталтеш.
Марий Эл Республикым вуйлатышын организаций да
аналитике виктемжын уверже-влак негызеш
Л.Камалетдинова ямдылен.
