Тиде кечын пограничный войска-влакын ветеранышт, боевой действий-шамычын участникышт молгунамсе семынак Йошкар-Оласе Тӱвыра да каныме рӱдӧ паркыште верланыше локальный сарлаште вуйым пыштыше сарзе-влаклан мемориал воктене погыненыт.
Пайрем митингыш толшо-влакым законодательный органын лӱмжӧ дене Кугыжаныш Погын председательын алмаштышыже Лариса Яковлева саламлен.
– Пограничник-шамычын пайремышт элыштына эреак кумдан палемдалтеш. Тиде кече ӱшаным, куатым, лӱдыкшӧ деч аралыме улмым, шке эл дене кугешнымым да Российым чон пытен йӧратымым ончыкта. Ончычсо пограничник уке. Тендан Шочмо элым аралышын суапле порысшо дене кылда эрелан аралалт кодеш. Те шке жапдан чын геройжо, эл да калык ончылно порыслан ӱшанле пример улыда, – манын тудо.
Депутат ветеран-пограничник-влакын самырык тукымым куштымаште кугу верым налмыштымат палемден. Тидым Марий Элысе ветеран-пограничник-шамычын «Застава» мер организацийыштын йыжыҥъеҥже Алексей Крандаевлан мер пашашке чолган ушнымыжлан да молодёжьым военно-патриотический шӱлышеш куштымаште кугу надырым пыштымыжлан Кугыжаныш Погынын Тауштымо серышыжым кучыктен пеҥгыдемден.
Мемнан чекна ӱшанле кидыште манын, чылалан тазалыкым, пиалым, порылыкым да тынысым тыланен.
Пайрем мероприятийыште Кугыжаныш Погынын депутатше-влак Алексей Красильников ден Алексей Шерстобитоват лийыныт.
Маргарита ИВАНОВА
Марий Эл Кугыжаныш Погынын фотожо
