Медведево посёлкышто 140 веран у йочасадым почыт.
Тидын нерген Марий Элым вуйлатыше Юрий Зайцев Медведево районышто паша дене лиймыж годым увертарен.
Проектым «Ясная поляна» частный инвестор-чоҥышо дене пырля илышыш пурташ палемдыме. У йочасад шуко пачеран илыме пӧртын ешарен чоҥымо кум тӱжем утла наре квадратный метран кумдыкыштыжо икымше да кокымшо пачашлаште лиеш.
Марий Элым вуйлатыше палемден, тиде микрорайонышто шуко самырык еш ила, сандене йочасад моткоч кӱлеш. «Ола типан Медведево посёлко вияҥеш да йочасадлаште ешартыш верым йодеш. Шым группым почмо тиде микрорайонышто йочасадыш черетыш шогышо чыла гаяк икшывылан дошкольный образованийым налаш йӧным ышта», – каласен тудо.
Марий Элым вуйлатышын пресс-службыжын уверже негызеш Галина Кожевникова ямдылен
Фотом Марий Элым вуйлатышын пресс-службыж гыч налме
