УВЕР ЙОГЫН

«Ме тыге илена»

Россий мучко эртаралтше «Уло еш дене» проектын конкурсышкыжо ушнышо-влак кокла гыч эше иктыже – Марий Турек поселко гыч Шуталевмыт еш.

Шым шочшан тиде еш нерген газетыштына кодшо кеҥежым возенна ыле. Но, тевыс, уэш нунын нерген каласкалаш амал лектын.

Паледа, нуно могай чот чолга улыт?! Ава нерген гын поснак ойлыман. Эн ончычак тудо шкеже лач тыгай, санденак молыштат воктеныже тыгаяк улыт. Чынрак каласаш гын, тыгаяк лийде огыт керт! Вет Светлана локомотив гай чылаштым ончыко шупшеш, наҥгая, шӱка. Еш дене мом пырля ыштышаш шотышто шонымашыже тунаре – иктыштланат яра шинчаш огеш пу! Нуно эре могай-гынат конкурсыш ушнат да кажныштыже гаяк сеҥат, ойыртемалтыт, палемдалтыт.

Теве кызытат Светлана, шкенжын ойлымыж почеш, «Уло еш дене» конкурсыш ушнаш але уке манын шонен-шонен да содыки тидым ышташ  лийыныт. Тыге конкурсын заданийже-влак дене келшыше еш фотографий-влакым ик кече жапыште вераҥден!

– Лач тунамак, 6 февральыште, мылам ончычсо паша верем гыч йыҥгыртышт да тушко ушнаш кумылда уке мо манын йодыч. Мый ойлышым: «Тудлан келшен толшо фотографийна-влак шуко улыт, но ме эше шонена». Тунам кутырен савырен кертыч, да мый тиде кастенак фотографий-влакым ппроектын сайтышкыже вераҥдышым, – палдарыш Светлана. –  Ме еш дене кеч-кушко каена, кеч-мом пырля ыштена гынат, чылажымат: У ийлан ямдылалтмым, пӧлекым ыштымым, кожым сӧрастарымым, курык гыч, тыгак Ий полатыште коньки дене мунчалтымым, чодырашке мийымым, ече дене коштмым… – чылажымат фотографироватлена. Кеч-могай пашажат, сомылжат ешге ий гыч ийыш шуктымо йӱлана. Ме тыге илена. Тиде мемнан кажне кечын эртарыме жапна. Санденак кунам конкурсыш ушнаш келшышна, ты кастене лӱмынжӧ ик-кок фотографийым веле ышташ логале.

Конкурсын ик заданийже дене келшышын, спорт дене кылым кучымым  ончыкташ кӱлын. Организатор-влак шкештак палемденыт: «Шахмат дене модмо фотографийым колтен кертыда».

– Мемнан йочана-влак шахмат дене шукертсек модыт. Икмынярынже тӱрлӧ таҥасымаште икымше верымат сеҥен налыт, вет ме нунын дене, тыгак шкештат икте-весышт  коклаште шахмат дене кажне кечын — кече коден манме гай модына.

Ушештарыме семын ойлаш гын, «Уло еш дене» конкурсыш ушнышашлан https://vk.com/im?media=&sel=-223569207 але https://xn--b1agaasct0bc6i.xn--p1ai/  адрес дене регистрироватлалтман. Тылеч вара 10 март марте кеч-могай еш тудын участникше лийын кертеш. Кажне кугарнян организатор у заданийым савыкта. Тудым арня жапыште ыштыман. Тыгодым кок хештегым: #всейсемьей да #всейсемьей12 палемдаш мондыман огыл.

Любовь Камалетдинова

Фотом еш альбом гыч налме

#всейсемьей

#всейсемьей12

Опубликовать в Одноклассники

Добавить комментарий