УВЕР ЙОГЫН

Эн сай еш – келшен илыше еш

2016 ий гыч элыштына «Идалыкын ешыже» всероссийский конкурс эртаралтеш. Эн ончычак тудо муниципал кӱкшытыштӧ увертаралтеш. Тушто вич номинацийыште сеҥыше-влак республиканский этапыш лектыт. Тыште  ойыртемалтше-влак регионын чапшым Россий кӱкшытыштӧ аралат.

Шукерте огыл республикыште тиде конкурсым иктешленыт. 25 участник гыч 5 еш сеҥышыш лектын.

«Ялысе еш» номинацийыште Шернур район гыч Светлана ден Иван Малининмытын ешышт ойыртемалтын. Вате-марий 27 ий пырля илат, кок ӱдырым да ик эргым ончен куштат. Верысе калык нуным келшен илымыштлан, поро кумылан, еҥлан эреак полшаш ямде улмыштлан да ялым тӱзатымаште  тыршымыштлан пагала.

«Шуко шочшан еш» номинацийыште Звенигово район гыч Елена ден Алексей Пырковмыт сеҥышыш лектыныт. Вате-марийын 11 икшывышт уло. Нуным ача-ава юмылан ӱшаныме шӱлышеш ончен-куштат.

«Еш – йӱлам аралыше» номинацийыште Волжский район гыч Екатерина ден  Алексей Кудрявцевмытын ешыштым эн сайлан шотленыт. Ныл эргышт ден ик ӱдырыштым калык тӱвыралан да йӱлалан кумылаҥдат. Тыгак нуно чылан пырля республикна да элна мучко путешествийыш чӱчкыдын коштыт. Тиде еш ялын да районын мер илышышкыжат чолган ушна.

«Самырык еш» номинацийыште Звенигово район гыч Анна ден Дмитрий Деминмытын ешыштым ойырен налыныт. Талантан вате-марий 8 ий пырля улыт да кок шочшыштым шке еш йӱлаштым арален да шуктен илаш туныктен куштат.

«Шӧртньӧ еш» номинацийыште сеҥышыш лекше еш лишыл жапыште пале лиеш.

Л.КАМАЛЕТДИНОВА

Опубликовать в Одноклассники

Добавить комментарий