Йошкар-Олаште илыше пиалан айдеме – тиде таза айдеме, шотлат калыклан кӱлешан проект-влакын координаторышт.
18 июльышто Марий Элым вуйлатыше Юрий Зайцевын тӱҥалтышыж почеш илышыш пурталтше «Таза республик» проектын кышкарыштыже «Тазалык пункт» Йошкар-Оласе Петров уремын 22-шо А пӧрт кудывечыштыже пашам ыштен. Тиде лачшымак тугай йӧн: те диспансеризацийым эрташ кӱлмӧ нерген шоналтен огыдал гын, тугеже ме шке тендан деке миена.
Тиде кечын оласе калык диспансеризацийын икымше йыжыҥжым эртен: вӱрыштӧ глюкозо ден холестеринын чотыштым, шинча кӧргысӧ да вӱргорнысо давленийын кугытшым тергыктен, антропометрический показатель-влакым да шодын кугытшым пален налын, врач-терапевт дене мутланен, южо еҥ ешартыш шымлымашке направленийым налын.
– Тазалык – пиалан илышын ик эн кӱлешан ужашыже, сандене тудым изинек эскераш кӱлеш. Российыште президент Владимир Владимирович Путинын пунчалже почеш калыкын тазалыкшым аралымашке виктаралтше нацпроект-влак пашам ыштат. Мемнан дене, Марий Элыште, тиде йодышым республикым вуйлатыше Юрий Викторович Зайцев шке контрольышкыжо налын – регионыштына тудын «Таза республик» проектше икымше ий веле огыл илышыш пурталтеш. Мый тазалыклан профилактике ден таза илыш-йӱла моткочак кӱлыт шонем. Ме калык дене, манмыла, мландымбалне мутланена, да тиде вашкыл, мутат уке, сай результатым пуа, – манеш врач, Марий Эл Кугыжаныш Погынын депутатше да мер пашаеҥ Максим Бронников.
«Таза республик» проектын координаторжо семын пашам ышташ кумылан еҥ-влакын чолгалыкышт куандара. Нуно жапым муыт да таза илыш-йӱла нерген оҥайын каласкалат, оласе калыкым тазалыклан тӱткышым ойыраш, шымлымашым эрташ ӱжыт.
– Айдеме тазалыкшым тергаш да диспансеризацийым эрташ кӱлмӧ нерген шоналта гын, пашам арам огына ыште! Олана койын вашталтеш да моторештеш, тугеже тудын калыкшат таза лийшаш! – манеш проектын ик координаторжо Андрей Сакович.
Тиде кечын Йошкар-Оласе 1-ше №-ан поликлиникын специалистше-влак волонтёр-медик-шамычын полшымышт дене 120 утла пациентлан эмлалтме да профилактике шотан консультацийым пуэныт.
М.ИВАНОВА
«Марий Эл» увер агентствын фотожо
