Физкульт, ура!
Вуй кана, капкыл пеҥгыдемеш
Тений Марий Элыште куштылго атлетике дене ятыр таҥасымаш эртаралтын, кызытат эртаралтеш. Чемпионат, первенстве, пелемарафон… Верысе спортсмен-профессионал, тыгак куржталаш йӧратыше-шамыч кундемыштына, ӧрдыж верлаште эртыше турнирлаштат вийыштым тергеныт, сай результатым ончыктеныт.
Таче лудшына-влакым кокымшо тӱшкашке пурышо да куштылго атлетикыште ойыртемалтше рвезе Шернур посёлкысо «Родник здоровья» аптекын провизоржо Алексей Ахтямов дене лишкырак палдарена.
Тиде тургымышто Алексейым чӱчкыдынак сеҥыше радамыште ужынна. Мутлан, XXXVIII пелемарафонын абсолютный чемпионжо лийын. Спортсмен-любитель (любитель с профессональным подходом – шкенжым тыге манеш) 21,1 километрым 1 шагатат 11 минут 21 секундышто эртен. «Нацийын кроссшо-2022» тӱшка стартынат сеҥышыже – адакат Алексей. Оза‰ олаште триатлон дене эртыше та‰асымаште Шернур районын эргыже «Revoseal» команде дене вийжым терген, икмыняр гана призёрыш логалын, а тений – сеҥышыш.
Тыге тӱрлӧ спорт мероприятийлашке лектын, илышыш ойыртемым пурташ тырша, лӱмлӧ спортсмен-влак дене палыме лиеш. Мутлан, Олимпийский модмашын ший призёржо Максим Вылегжанин дене пырля куржталашыже логалын.
– Мыланем йӱран игечыште куржталаш келша. Шкешотан романтике. Ме Андрей изам дене коктын ялыште пасулаште, олыклаште, паркыште, чодыраште, икманаш, яндар южышто куржталына. Мыланна тиде келша, – ойла А.Ахтямов. – Мутлан, кеҥеж эрдене кече лекмым ужат, а кастене – ӱжара шичмым, кайык йӱкым колыштат – могай куан! Вургемымат, йолчиемымат игечым шотыш налын чиена. Ик мужыр кроссовко лавыран, ночко игечылан келшен толшо гын, весе – кукшо игечылан, тыгак трнировкылан да стартыш лекташ посна кроссовкына уло.
Тӱрлӧ кундемыш – экскурсий семын
Тений Алексейын икымше стартше апрель тылзыште Шернур кундемыштак лийын. «Большие Ключи – Марисола» трассыште, варажым 1 майлан пӧлеклалтше эстафетыште, Советский районышто, тыгак 9 майлан Шоруньжаште эртаралтше таҥасмашлаште тудо ик эн ончыко лектын.
– Чыла таҥасымаш историй шӱлышан. 28 майыште Ахтямовмытын призышт верч пробег лийын. Икымше гана. Ончыкшым тудым йӱлаш пурташ, спорт пайремым ышташ шонена. Тӱрлӧ вере куржталат, верысе калыкын кузе илымыштым, мом ыштымыштым ужат, сылне марий вершӧрла дене палыме лият, икманаш, чылажат экскурсий семын эрта, – манеш Алексей. – «Зеленый марафоным» (пелемарафоным) эн тӱҥ стартлан шотлем.
Ончычсо «Йошкар-Ола – Шап» пелемарафон Йошкар-Олаш кусаралтын. Жапше годым тале куштылго атлет туштат вийжым терген шуктен. 2012, 2013 ийлаште шке тӱшкаштыже 4-ше верым налын.
Монча вийым пуа
Ахтямовмыт еш (ача, Андрей изаже да шкеже) кажне кечын куржталыт. Аваштат – таза илыш-йӱлан ӱшанле таҥже.
– Куржталаш мыланем – куан. Куржталат – капкылет лывырга, яндар юж дене пойдаралтат, – манеш Алексей. – Марафонлан ямдылалтме годым 30-35 километрым куржын эртем, а ачам – 9 километрым. Такшым ме изинекак изам дене ӱчашен куржталынна. Тудо мыйын спаринг-партнёрем (шыргыжеш авт.). Кросс деч вара мончаш пурена.
Мутат уке, организмым шотыш кондаш монча полша. Кажне арнян олтат. Адакшым массажымат ышташ огыт мондо. Тидат кӱлешан. Ялыште ончен-куштен налме пакчасаска, чодырасе емыжымат погат, компотым ыштат, вареньым шолтат. Чыла тидыже – организмлан пайдале витамин.
Кум спортсмен, кум фармацепт
Шукышт Алексей Ахтямовым тале куштылго атлет улмыжлан кӧра физический культур дене кылдалтше вузым пытарен манын шонат, но уке… Тыштат пеш оҥай историй: ачаже, Юрий Абдрахманович Озаҥ оласе фармацептический университетым тунем лектын, вузын чапшым спортсмен семын арален. Варажым Андрей изажат туштак тунемын, ты вид денак сай результатым ончыктен. Алексеят ачаж ден изажын корныжым шуен да тыгодым университетыште ик эн чолга, тале спортсмен семын аклалтын. Эсогыл «За заслуги перед университетом» значок дене палемдалтын. Тиде марий рвезылан кугу куан лийын.
Кум спортсмен кумытынат поэзий да романтик шӱлышан улыт, почеламутым возат. Ачашт, Юрий Ахтямов икмыняр мурылан семым пыштен да шкеак мура.
«Лай мардеж»
Университетыште тунеммыж годым чыла вере шукташ тыршен да тидыже Алексейлан келшен веле. Мутат уке, спортлан кугу тӱткышым ойырен, вузын чапшым арален. Сборыш Кавказ курыклаш колтеныт. Жапше годым Татарстанын чемпионжо лийын. Саранскыште Российын чемпионатыштыже, 6-шо верым налын. Шернур эрге спортын икмыняр видше дене спорт мастерыш кандидат нормативым шуктен.
– Шарнем, студент годым Морко район гыч Марат Евсеев «Лай мардеж» ансамбльыш ӱжын. Келшенам, марла кушташ тунемынам. Но икымше гана концерт дене ача-авамын шочмо Татарстан кундемышкыже миенна, марла куштымем дене родо-тукымемат изиш ӧрыктаренам, – эртышым каласкала Алексей Ахтямов. – Ты ансамбль дене Эстонийыш миенна. Тидат мыйын шкешотан хобби. Тыге тӱрлӧ кундемла дене палыме лийме.
Чылалан негыз – школышто
Куштылго атлетикыш Алексейын корныжо школышто тунеммыж годым футбол гычат тӱҥалын. Футбол дене талын модын, Шернур командын чапшым арален. Тудо тунам эн писе нападающий лийын. «Шӱштӧ мече» всероссийский турнирын регионал этапыштыже кумшо верым налыныт. Лийын, футзал модмаште эн шуко голым пуртен, тушто эн сай нападающий семын палемдалтын. Варажым Шернур районысо команде дене куштылго атлетике дене эртыше республик кӱкшытан турнирыш толын, ПГТУ-што 1500 метрым куржталмаште чолга рвезе 3 верым налын. Варажым Озаҥ олаште школьник-влак коклаште Юл кундем федерал округын таҥасымаштыже вийым терген. Тидат тудлан сай шӱкалтышым ыштен, опытым пуэн. Но рвезе посна спортым гына ойыраш шонен огыл. Тыге Озаҥ оласе фармацептический университетым тунемаш пурен. А спорт тудлан мешаен огыл, мӧҥгешла. Молодёжь-влак коклаште эртаралтше Российын чемпионатыштыже 10 километрыште кумшо верым налын. Москвасе тӱнямбал марафоныштат вийжым терген шуктен, спорт мастерыш кандидат нормативым эше ик гана пеҥгыдемден. Икманаш, чыла вере шкенжым тергаш тыршен да кызытат кертмыж семын тӱрлӧ стартлашке лектеш. тыгодым Алексей молыланат куржталаш, эреак тарванылаш темла.
– Кеч скандинав коштамш дене ошкыл, велосипед дене кудалышт, ече дене мунчалте, эн тӱҥжӧ – яндар южыш лекташ шкан жапым муаш, – манеш тудо.
Е.Эшкинина.
Куржталмаште мыйын пиалем
Молан куржталаш мый йӧратем?
Тиде йодыш вуйыштем пӧрдеш.
Куржталмаште мыйын пиалем!
Куржталмаште вӱр тазан модеш,
Чон кана да кап шулдыраҥеш,
Оҥышкем яндар юж тич темеш,
Ну, а мый куржам! Куржам! Чошем!
Куржталмаш – ах, могай куан!
Айста пырля куржталаш лекса.
Тек куржталше кажне айдемат
Шке пеленже весым тарата!
