Марий Элым вуйлатыше Юрий Зайцев Советский районышто илышыш пурталтше проект-влакым шке контрольыштыжо куча. Тиде кечылаште тудо кундемысе ик эн кӱлешан объектыш миен коштын.
Регионым вуйлатыше верысе Аграрно-строительный техникумышто лийын, тачысе кечылан тудын кӱлешлыкшым палемден. Тений 1 сентябрь гыч тиде тунемме верыште 324 еҥ шкан келшыше специальностьлан тунемаш тӱҥалеш. Техникумышто профессионал мастарлык дене регион кӱкшытан «Профессионал-влак» чемпионат эртаралтеш.
Пытартыш жапыште Роҥго кундемыште илыше-влак верысе предприятийын южыш осал веществам шаркалымыжлан вуйым шийыныт. Республикым вуйлатыше ты объектыштат лийын. Тудлан увертареныт: медицине отходым йӱлатыме установкым демонтироватлыме. Туге гынат Россий Федераций УК-н 247-ше статьяжын 1-ше ужашыже дене келшышын уголовный делам тарватыме. «Калык вуйым шиеш, тугеже тиде – кугу сигнал. Чыла шотышто сайын тергыман. Но эн тӱҥжӧ – калык, муниципальный кучем, республикым вуйлатыме пашаште тыршыше да федеральный стурктур-влак кокласе вашкыл. Тудын лектышыже уло. Ме калыклан пашам ыштена», – каласен Юрий Зайцев.
Советский районышто тудо тыгак Ургаш посёлкышто тулык йоча-влаклан чоҥалтше пӧртыштӧ лийын. Подрядчикын мутшо почеш, тиде паша тений ноябрьлан мучашлалтеш.
Юрий Зайцев тыгак Советский посёлкысо Сеҥымаш уремысе корным уэмден олмыктымо пашам терген. Ты корно дене еҥ-влак эмлымверыш, спорткомплексыш да школыш коштыт, сандене кӱлешлыкше кугу. «Сай качестван лӱдыкшыдымӧ корно» национальный проект кышкарыште ышталтше паша шке радамже дене эрта. Тений посёлкышто тудын дене келшышын эше ныл уремым (чумыр налмаште 5 километр кужытым) уэмдаш палемдыме. Регионым вуйлатыше палемден: районышто корным олмыктымо паша сайын кая. «Мемнан республик «Сай качестван лӱдыкшыдымо корно» национальный проектыш ушнен веле огыл, тудым эн сайын шуктышо лу регион радамыште ончыл верым айла», – каласен тудо.
Ты кечын Юрий Зайцев тыгак хоккей коробкым чоҥымым терген. Тудыжо верысе сай тӱҥалтышлан полышым пуышо проект кышкарыште ышталтеш. Ончыкыжым тыште мини-футбол, волейбол, баскетбол дене модаш шуко функциян спорт объект лиеш. Площадкыште спортым да физкультурым йӧратыше-влаклан идалык мучко тренировкыш кошташ йӧн ышталтеш. Республикым вуйлатышын палемдымыж почеш, тыгай проект – районын спорт инфраструктуржым вияҥдыше да самырык тукымым таза илыш-йӱлалан кумылаҥдыше ошкыл.
Мучашлан Юрий Зайцев районысо администрацийыште совещанийым эртарен. Тушто верысе тӱвыра, спорт да образований тӧнежлам олмыктымо, тыгак Советский посёлкышто вӱд сетьым уэмдыме дене кылдалтше йодышым каҥашеныт.
Марий Эл вуйлатышын пресс-службыжын уверже негызеш Г.Кожевникова ямдылен
