Марий Элын Тӱвыра, савыктыш да калык паша шотышто министерствыштыже XI Марий калык погынлан ямдылалтме да тудым эртарен колтымо шотышо пашаче тӱшка-влакын заседанийышт эртен. Тиде кугу форум тений Йошкар-Олаште 10-11 апрельыште эртышаш. Тушко 412 наре делегат погынышаш. Ончылгоч палемдыме вич секцийыште калыкнан ончыкылыкшо, тургыжландарыше йодышыжо-влак нерген каҥашаш тӱҥалыт.
Мер Каҥаш вуйлатыше, Оньыжа Эдуард Александровын палемдымыж почеш, погынлан ямдылалтме амал денак кандаш пашаче тӱшкам ыштыме. Республикын районлаштыже да марий-влакын тӱшкан илыме кундемлаштыже тений 29 февраль марте граждан-влакын погынымашышт эртаралтыт да тушто делегат-влакым сайлат. 1 мартыште Йошкар-Олаште тиде кугу форумым ямдылен да эртарен колтымо шотышто штаб почылтеш.
Тӱвыра, савыктыш да калык паша шотышто министр Консантин Ивановын палемдымыж почеш, марий рӱдола погыныш толшо уна-шамычым тӱрлӧ сынан оҥай тӱвыра программе дене вашлийшаш.
С.НОСОВА
