Кушкыжмын сӧрымым шуктена – Йошкар-Олан шочмо кечыжым палемдыме годым тидлан пӧлеклалтше эше могай мероприятий-влак лийме нерген умбакыже каласкалена.
Шуматкечын патриарший площадьыште кечыгут манме гаяк Калыкле кухньын кокымшо фестивальыже эртен.
Ты гана участник-шамыч тӱрлӧ сынан пельменьым ямдыленыт. Вет фестиваль тыгак маналтын: «День пельмень». Элнан икмыняр кундемже гыч толшо шеф-повар-шамыч жюри еҥ-влакым тӱрлӧ рецепт почеш ямдылыме подкогыльо да пельмень дене ӧрыктараш тыршеныт. Мутлан, Марий Эл гыч тушко Оршанке район Изи Кугланур ял гыч Елена Скворцова ушнен. Тудо коважын (а тудыжым кугезе коваже туныктен) рецептше почеш подкогыльым маска шыл гыч ямдылен да сеҥышыш лектын – «Рандеву» кафен ямдылыме «Ава подкогыльыжо» фестивальыште гран-при дене палемдалтын! Молан «Ава» маналтын? Марий орнамент дене сӧрастарыме руаш кӧргыштӧ ятыр изи подкогыльо лийын!)
Тиде жапыште тыште тӱрлӧ группо ден коллектив-шамыч выступатленыт. А нунын деч вара «Звук Евразии» всероссийский музыкальный проектын финалистше-шамыч шке мастарлыкыштым ончыктышт. Могай талантан улыт!
Нунын мурымышт, семым шоктымышт жапыште сценын пурла велныже паша шолеш ыле. Тыште шордо сынан келге калай формыш подкогыльым оптеныт. Мый лач ваштарешыштак шогем ылят, мо кузе ышталтмым тӱткынак ужаш йӧнем лие. Конешне, шкежак шотлен шым шого, а вара каласышт: тидлан 1800 наре подкогыльым кучылтыныт. Но шолтымым огыл, а кӱктымым. Вараже тудым еҥ-влаклан пуэдышт. Лишнак шогымем дене шӱкедылмашке шым логал – полиэтилен пакетыш икте дене оптымо сийым ласкан гына налын ошкыльым. Пеш тамле ыле…
Тыштак умбакыже Э.Сапаев лӱмеш опер да балет театрын артистше-влак концертым ончыктышт: симфонический оркестр тӱрлӧ сылне семым шоктыш, тыгак тудын шоктымыж почеш театрын солистше-влак мурышт.
Да нуно веле огыл. Российын сулло артисткыже Ольга Кормухинат тиде оркестрын шоктымыж почешак кумдан палыме мурыжо-влакым йоҥгалтарыш.
А сценыш тудын лекмыж деч ончыч площадьыште улшо калык Йошкар-Олан гимнжым чылан пырля йоҥгалтарышна! Тыгаже тений икымше гана лийын. Тиде жапыште кумыл, паледа, кузе нӧлталтын ыле, вет кажныже йӧратыме оланан ик ужашыже улмым шижынна!
Вес мероприятият тений икымше гана эртаралтын. Тиде – «Йошка еш» регион кокласе гастрономический фестиваль. Тушко ушнышо-влак рушарнян, 6 августышто, Чарла кремльыш чумыргеныт. Мероприятий 11 шагатлан тӱҥале да кас марте шуйныш. Тудым торжественно почмашке республикысе правительстве председательын икымше алмаштышыже Михаил Васютин ден олан мэрже Евгений Маслов толыныт ыле.
Фестивальын участникше-шамыч, а нуно Марий Эл деч посна эше Москва, Ижевск да Сыктывкар гыч лийыныт, кажныже жюрим ойыртемалтше кочкышым ямдылымыж дене ӧрыктараш тыршен. 40 наре тӱрлӧ сийым тамлен ончымеке, профессионал эксперт да дегустатор-влак теве кӧмытым палемденыт:
«Кулинарные изыски» номинацийыште – «Изба» унам вашлийше комплекс;
«Классика вкуса» номинацийыште – «Чебуречек» кафе;
«Традиции гостеприимства» номинацийыште – «Мари» сийгудо;
«География вкусов» номинацийыште – «Бобровая долина» этнокомплекс (Ижевск);
«Вкусно вне времени» номинацийыште – «Ядальня» гастрономий проект (Москва);
«Финно-угорские мотивы» номинацийыште – «Горизонт событий» гастробар (Сыктывкар);
«Гастрономическое искусство» номинацийыште – «Сырная лавка» (Шернур сырзавод).
Эше икмыняр моло заведений вес номинацийлаште палемдалтыч. А «Золотая тарелка» премийын гран-прижым «Поҥго-догшылан» «EXPERT» АЗС сеҥен нале.
Весымат каласен кодыман: 6 августышто Чарла кремльыште Шернур сырзаводын «Рецепт №1» у сыржын презентацийже эртыш. Тудым ойыртемалтше технологий почеш ушкал, каза да шорык шӧр гыч ямдыленыт. Тидлан 650 литр шӧр кучылталтын. Нелытше 63,3 килограммыш шуын. Тыге «Рецепт № 1» сыр Российыште эн кугу пеҥгыде сыр семын Российын рекорд книгашкыже логалын!
Тиде кумда мероприятийым мучашлыме семын Чарла кремльыш погынышо-влаклан Карина Кокс, икмыняр ий ончыч поснак кумдан палыме «Сливки» группын ондакысе участницыже, концертым ончыктыш.
Изиш варарак, 20 шагат эрталтымеке, Патриарший площадьыште Москва гыч толшо вес «шӱдыр» – чапланыше «Винтаж» группо – шке мурылаж дене куандарыш. Тудын концертше Йошкар-Олан шочмо кечыжлан пӧлеклалтше пайремым мучашлыш.
Йыргешке огыл датым тыге кумдан палемдышна гын, 440 ий темме лӱмешыже, оҥай, мо лиеш?!.
Любовь Камалетдинова
Авторын фотожо
