Йошкар-Оласе Пӱнчер ото шотышто ӱчашымаш тарваныме нерген шукынжо колында, очыни. Пӱнчерыште кушшо пушеҥге-влакым руымо да тушто шуко пачашан пӧрт-влакым чоҥаш тӱҥалме нерген увер писын шарлен.
Олан мэрже Евгений Маслов кодшо рушарнян Йошкар-Олаште илыше-влак деке видеообращений дене лекмыж годымат, тыгак оласе депутат да мэрийын пашаеҥже-влак дене пырля Пӱнчер отышто инициативный группо дене вашлиймыж годымат иктымак ойлен: тиде чын огыл, шоя, кызытсе мут дене ойлаш гын, фейк.
– Тиде шоя увер. Шошым вӱд ташлыман яра кийыше олыкышто шуко пачашан пӧрт-влакым чоҥымо шотышто оласе кучем нимогай пунчалымат луктын огыл. Пӱнчер ото да тушто курымла дене кушшо пушеҥге-шамыч калыкын поянлыкшылан (достоянийжылан) шотлалтыт. Сосновка (Пӱнчер ото – авт.) посна аралыме пӱртӱс кумдыклан шотлалтеш, сандене еҥ-влак тушто мо шонымыштым ыштен огыт керт, – каласен мэр.
Манеш-манешлан шарлашыже мо вара амалым пуэн? Соцкылысе тӱрлӧ тӱшкаште, Пӱнчер ото кумдык шотышто мэрийын планже манын, сӱретым вераҥдылыт. Вашмут семын ола администраций соцсеть гоч тыгай официальный комментарийым пуэн: «Сибирь лабораторийын урбанист-влак компаний Йошкар-Олалан 400 ий темме лӱмеш парк да тудын пелен улшо кумдыкла шотышто мастер-планым ыштен. Ола администраций тушто нимогай чоҥымо пашам тӱҥалаш пунчалын огыл. Мастер-планым ыштен шуктымек, нине кумдык-влак шотышто темлымаш ден вашталтыш-влакым олан Генеральный планышкыже пурташ тӱҥалыт. Но пуртымо деч ончыч мер каҥашымаш лиеш». Ушештарена, тыгай мер каҥашымаш 4 октябрьыште тӱҥалын, чылаштым тушко ушнаш ӱжыт.
Тугеже сӱрет йоҥылыш шонымашым луктын.
Умылыдымашын вес амалже – Изи Какшан серыште, у кӱвар тураште, чынжымак, кугу паша кая. Ӧрдыж гыч ончалмаште, пуйто ала-мом чоҥашак тӱҥалыныт.
Тиде йодышым рашемдаш Марий Элын пӱртӱс поянлык, экологий да йырым-йыр улшо средам аралыме министржын алмаштышыже Сергей Поповын «Марийская правда» газетлан пуымо интервьюжо полша. Тудо палемден:
– 2023 ийыште Ширяйково микрорайон воктене Изи Какшанын вӱд йогын корныжым эрыкташ тӱҥалме. Пашан акше 48 миллион теҥгеш шуэш. Проектым шуктышыла, эҥер пундаш гыч 50 тӱжем тонн йошкыным кӱнчен луктына да 3,5 гектарыште вӱд йогыным эрыктена. Паша кугыжаныш экспертизым эртыше проект документаций почеш шукталтеш.
Кызыт технологический корно, тыгак карт-площадке ышталтыт, тушкыжо эҥер пундашысе рокым шупшыктена. Иктаж-кӧм лӱдыкта гын, мый ӱшандарен каласен кертам: йошкын мландыште нимогай аяр уке, йырым-йыр средалан нимогай эҥгек ок ышталт.
Эҥерым ме 2007 ий гычак эрыктена. Тиде кӱлешан паша, кокытеланымаш уке. Олаште илыше-влак шкештак порядкым ышташ йодыт, молан манаш гын эҥер йогын кушкын пытен, купым ушештара. Паша кӱжгӱ, 2030 ийлан мучашлаш палемденна.
Манеш-манешлан шарлаш амал эре лектеш. Сандене кеч-могай кугу пашам тӱҥалме деч ончыч калыклан умылтараш гын, тыгай томаша ок лек ыле. А калыкым вурсаш ок лий, вет тудо Пӱнчер ото, тусо курымла дене вийналтше пушеҥге-влак верч тургыжланымыжым луктын ончыктен.
Л.СЕМЕНОВА
Йошкар-Ола администрацийын официальный сайтше гыч налме
