«Ола» предпиятийын пашазыже-влак июнь тылзын кум арня жапыштыже 47 тонн куштырам погеныт. Нуно ты сомылым, канышым да пайремым ончыде, кажне кечын шуктат.
Тынар шӱкшакше кушечын, йодыш лектеш, очыни. Нигӧм титаклаш, йӧратыме оланам ме шке тыге куштыраҥдена: корно воктенысе газоныш, тӱшкан каныме верлаште, парк ден скверлаште тор-шӱкшакым кышкена, уремлаште вераҥдыме урнылат тич темыт.
Коммунал пашаеҥ-влак тыгак корно мучко шуйнышо кӱртньӧ авыртышым чиялтат. Воскресенский проспектыште да Красноармейский уремыште тыгай «пече-влак» у тӱсым налыныт.
Корно бригаде нине кечылаште Советский да Комсомольский уремлаште эше ик кӱлешан пашам ыштат – йӱр вӱд йоген кайыше канализацийым эрыктат.
Л.СЕМЕНОВА
Фотом Йошкар-Ола администрацийын сайтше гыч налме
