УВЕР ЙОГЫН

1 – 7 июльлан гороскоп (2024)

 

Шорык

Тиде арнян шӱдыр-влак тыланда тӱткӧ лияш темлат, молан манаш гын удам шонышо-шамыч иктаж чаракым ыштен, манеш-манешым колтен кертыт. Пашалан утыждене шуко жапым ойырыман огыл. Лучо ешда дене утларак пырля лияш тыршыза.

Презе

Нине кечылаште поснак чолга да чулым лийыда. Усталык шӱлышда утларак палдырна, «шымше шижмашдат» вияҥеш. Нине амал дене тиде арнян пашада поснак сайын ушна, адакшым кыртмен тыршаш шкенданат кумылда молгунамсе деч шукырак лиеш.

Йыгыр

Паша верым вашталтынеда але вес сомылым шукташ тӱҥалнеда гын, тидлан ты арня поснак келшен толеш. Тиде жапыште вий-куатдам ешарен, лишыл еҥда-влаклан полшен, ондакысе кылым уэмден кертыда. Планыш вашталтышым пурташ логалеш, очыни.

Рак

Лишыл еҥ-влак дене шкем тыматлын кучыман, уке гын нунын дене умылыдымаш лектын, вурседылмаш тарванен кертеш. Уда койыш-шоктышан еҥ-шамыч дене кылым ыштыман огыл. Тиде нимо сайышкат огеш шукто. Шергакан сатум налаш огеш темлалт.

Лев

Профессионал пашалан келшыше арня лиеш. Кеч-кушко каеда, тӱрлӧ вашлиймашым эртареда гынат, чылажат кӱлеш семын ворана. Икманаш, у паша шотлан толеш да кугу лектышыш шуаш полша. Тыге вий-куатдат палынак ешаралтеш.

Ӱдыр

Тиде арнян ондакысе ала-могай сомыл деч пайдам налыда. Ончычсо йолташда але шӱмбелда деч уверым колыда. Пӧръеҥ-шамычлан лишыл еҥышт дене вурседылаш огеш темлалт. Ӱдыр, ӱдырамаш-влаклан йӧратымаш кыллан кугурак тӱткышым ойырыман.

Виса

Тендан ончыкылыкым ужын моштымо мастарлыкда почылт кертеш. Тиде арнян пашадат молгунамсе деч писынрак ушнаш тӱҥалеш. Кеч-могай нелылык гыч кызыт куштылгын лектыда. Путешествийыш каяш, кугу сатум налаш келшыше жап.

Скорпион

Нине кечылаште тӱшка мероприятийым эртараш але тушко ушнаш келшен толеш. Пашаште коллективда дене иктаж-кушко каналташ пырля миен толын кертыда. Тыгодым шекланыман, молан манаш гын тазалык лунчыргымо лӱдыкшӧ уло.

Пикшызе

Тиде арняште ондак тӱҥалме пашам мучашлаш, шкешотан иктешлымашым ышташ, лишыл еҥ-влак дене жапым пырля утларак эртараш  темлалтеш. Палемдыме сомылым ыштен шукташ манын, тудым весе-влак дене иквереш ыштыман.

Ирказа

Пӱрымаш тыланда вучыдымо нелылык-влакым колтен кертеш. Тидлан кӧра молгунамсе деч писынрак шонен, ситуацийым чын аклен моштымыда кӱлеш лийыт. У еҥ-влак дене палыме лийме годым тӱткылык нерген мондыман огыл.

Вӱд йоктарыше

Тиде арнян шӱдыр-влак лишыл еҥ-шамычым ала-мо шотышто ӱшандараш тыршышашлан вий-куатым пытараш огыт темле. Нине кечылаште илыш умылымашда вучыдымын вашталт кертеш. Вес пашашке куснынеда гын, тидым ышташ темлалтеш.

Кол

Тиде арня – шонымашым шукташ ик эн келшыше жап. Нине кечылаште ыштыме вашкыл але иктаж-могай паша кугу лектышым кондат. Интуицийда вияҥеш. Шкет улыда гын, у шӱмбелым вашлийын кертыда. Ончыкыжым илышыштыда тудо чот кӱлешан айдемыш савырна.

 

Ӱпым пӱчкаш тарваненда гын

1 июль. Таче ӱпым пӱчман огыл, уке гын тазалык тургыжландараш тӱҥал кертеш. Ӱпым чиялтеда гын, еҥ-влак дене вурседылмаш тарвана.

2 июль. Ӱпым пӱчмылан кӧра депрессий лийын кертеш. Ӱпым чиялташат огеш темлалт.

3 июль. Тиде кечын ӱпым пӱчкыда гын, чоныштыда ласкалык озаланаш тӱҥалеш. Ӱпым молгунамсе деч ойыртемалтше тӱсыш чиялтыме тазалыкым пеҥгыдемдаш, шийвундым ешараш полша.

4 июль. Ӱпым пӱчмӧ деч вара еҥ-влаклан утларак келшаш тӱҥалыда. Ӱпым чиялташ келшыше кече огыл.

5 июль. Ӱпым пӱчкашат, чиялташат огеш темлалт. Молан манаш гын тидлан кӧра вий-куатда иземын, окса чӱдылык шижалташ тӱҥалын кертыт.

6 июль. Тиде кечынат шӱдыр-влак ӱпым пӱчкашат, чиялташат огыт темле.

7 июль. Таче ӱпым пӱчкыда гын, ончыкыжым роскотыш пуреда. Ӱпым натуральный чия дене чиялтеда гын, карьер тошкалтыш дене кӱзаш йӧн лиеш.

Л.Камалетдинова

Авторын фотожо

Опубликовать в Одноклассники

Добавить комментарий