7 февральыште МарНИИЯЛИ-ште Россий наукын кечыжлан пӧлеклалтше «Гуманитарный науко кызыт да тудым ончыкыжым вияҥдымаш» научный сессий лийын.
Тудо Марий Элыште тенийысе Науко фестиваль да Российыште Науко да технологийлан лу ийым палемдыме кышкарыште эртаралтын.
Торжественный заседанийыште МарНИИЯЛИ-н директоржо Людмила Григорьева институтын 2024 ийыште сеҥымашыже-влак дене палдарен. Погынышо-влаклан саламлыме мутым Марий Эл тӱвыра, савыктыш да калык-влакын пашашт шотышто алмаштышыже Игорь Садовин, Марий университетын ректоржо, республикысе Кугыжаныш Погынын депутатше Михаил Швецов, Юл кундем кугыжаныш технологий университетын ректоржо Игорь Петухов, Марий Элын ончычсо образований министрже Римма Катаева ойленыт.
Тидын деч вара «Регионлаште Российысе нацийын пеҥгыде ончыкылыкшым шуен толмашке виктаралтше гуманитарный науко-влак: уэмдыме задаче» (МарГУ-н Калыкле тӱвыра да тӱвыра-влак кокласе кыл институтын директоржо Родион Чузаев), «Кӱшыл школышто гуманитарный образованийым да социально-гуманитарный наукым вияҥдыме специфике» (ПГТУ-н гуманитарный образований факультетын деканже Анна Артамонова), «Марий Эл Республикыште наций-влак да конфессий-шамыч кокласе кыл» (МарНИИЯЛИ-н «Социологий» направлений дене вудышӧ научный пашаеҥже Ольга Орлова), «Писатель да мут. XX курымын икымше пелыштыже Марий литератур процесс (монографийын презентацийже) (МарНИИЯЛИ-н «Литературоведений да фольклористике» направлений дене вӱдышӧ научный пашаеҥже Надежда Федосеева).
Заседанийыште тыгак археологий, историй да филологий дене кылдалтше доклад-влакым институтын научный пашаенже-влак Алексей Акилбаев, Сергей Свечников, Павел Леханов, Мария Ключева ыштеныт.
МарНИИЯЛИ-н материалже негызеш Г.Кожевникова ямдылен
Фотом институтын сайтше гыч налме
