Марий Эл вуйлатышын пашажым жаплан шуктышо Юрий Зайцевын кӱштымашыже почеш марий йылме дене географий лӱмлаште йоҥылыш шотышто калык мониторинг лиеш.
Оперативный совещанийыште тыгай задачым тудо Регионым виктарыме рӱдерым вуйлатыше ончылно шынден да палемден: ты шотышто йодыш пресс-конференцийже годым нӧлталтын. Молан манаш гын республикыште илыше-влак деч тидын дене кылдалтше йодмаш-шамыч ик гана веле огыл пуреныт.
«Марий йылме дене населённый пунктын лӱмжӧ да указатель-влакын спискыштым Минюстлан ямдылаш кӱштем, а Регионым виктарыме рӱдерлан – мониторингым эртараш.Тек еҥ-влак йоҥылышан фотом колтат. Кушко колтыман – нуно палышаш улыт», – каласен Юрий Зайцев.
Тудо ешарен: В.М.Васильев лӱмеш Йылмым, сылнымутым да историйым научнын шымлыше Марий институт географий объект-влакын лӱмыштым чын палемдыман методический материалым ямдылен.
«Нимогай йодыш ынже лек манын, чылажымат савыктыман. Тыште нимо шучкыжо уке, кеч-могай пашамат кид дене ыштыман. Тӧрлена, ыштена, уэш возена», – палемден тудо.
Марий Элым вуйлатышын пашажым жаплан шуктышо тыгак ушештарен: пресс-конференцийыште моло йодышат – социальный могырым кӱлешан объект-влакын леведышыштым олмыктымо, мландым муниципальный собственностьыш пуымо, вӱд дене кылдалтше – нӧлталтын. Нуным контрольыш налаш, иктешлымашым ышташ да увертараш кӱштен.
Марий Эл Республикым вуйлатышын организаций да аналитике виктемжын уверже негызеш Г.Кожевникова ямдылен.
