Ончыкылык туныктышылан – лӱман стипендий
Россий Просвещений министерстве педагогический вуз-влакын студентыштлан лӱман стипендийым пуымо дене кылдалтше программым илышыш пурташ тӱҥалеш.
Стипендийын кугытшо – 15 тӱжем теҥге. «Тудым келге шинчымашым ончыктышо, педагогике наукышто сеҥымашыш шушо, мер илышыште чолга студент-влак налаш тӱҥалыт», – палемден Россий Федераций просвещений министр Сергей Кравцов.
Лӱман стипендий Россий образованийын деятельже-влак А.С.Макаренко, В.А.Сухомлинский, К.Д.Ушинский, Л.С.Выготский да Н.М Карамзин лӱмеш лийыт. Тудын дене палемдаш студент-влакым конкурс почеш ойырат, тушко ушнаш йодмашым 2025 ий кеҥежым налаш тӱҥалыт.
Марий Эл Образований да науко министерствын уверже негызеш Галина Кожевникова ямдылен