Краснооктябрьский врачебный амбулаторийын врачше Дмитрий Лебедев ден Параньга районысо больницын фельдшерже Жанна Даутова Запорожье кундемыште шефствыш налме Куйбышев район гыч мӧҥгӧ пӧртылыныт.
Тиде гана нуно Розовка посёлкышто пашам ыштеныт. Командировкышто улмо тылзе наре жапыште приёмыш икымше гана толшо 289 пациентын тазалыкшым тергеныт, тыгак кокымшо але эсогыл кумшо гана толшо 43 еҥым приниматленыт. Тыгак индеш еҥлан инвалидность группым налаш медико-социальный экспертизым эрташ документым ямдыленыт.
Куйбышев районышто илыше калык Марий Эл гыч мийыше медик-влакын пашаштым кӱкшын акла, тыгодым профессионализмыштым веле огыл, поро да шокшо шӱм-чонан улмыштымат палемда.
– Куйбышев районлан полыш моткоч чот кӱлеш, – манеш Икымше медико-санитарный полышым пуымо Токмак оласе рӱдерын Розовка филиалжын тӱҥ врачше Ирина Демьяненко. – Мемнан дене кокла медперсоналым ситарыме шотышто сӱрет удажак огыл, а теве квалифицироватлыме врач-шамычын приёмышкышт логалаш моткоч неле, поснак – ялыште илыше-влаклан. Ӱмаште Марий Эл гыч кардиолог, невролог да терапевт толыныт ыле. Нуно мыланна диспансеризацийым эртараш полшеныт. Шкеже тӱшка практике врач улам, шукерте огыл филиалыштына педиатр пашам ышташ тӱҥалын – да тиде чыла врач кадр. Марий Эл гыч толшо медик-влакын пашашт мыланна кугу шӱкалтышым ыштен.
М.ИВАНОВА
Марий Эл Тазалык аралтыш министерствын фотожо
