Тачысе лаштыкын унаже Башкортостан Республик Дӧртыльӧ олаште шочын-кушкын. Казаньысе федерал университетын Набережные Челнасе филиалыштыже тунемын. Политологий специальностьым налын. Полиглот (марий, руш, татар, башкир, турко йылмылам пала), SММ-специалист, тиктокер. Мутем чолга ӱдыр Наталья ИЛИКБАЕВА нерген.
–Руш-влак коклаште кушкынат гынат, марий йылмым пеш сайын палет.
– Родо-тукым, ешем, йолташем-влак марий улыт. Ме вашла уналыкеш чӱчкыдын коштына. Мутланыме практике улмылан кӧра, йылмым арален кодаш куштылгырак. Тыгак тӱвырам шымлена да йӱла-влакым шуктен шогена.
– Наталья, мый палем, тый турко йылмым туныктымо курсым эртарет. Ты пашам шукташ мо таратен?
– Икана мылам Турцийысе ик унагудыш аниматор пашам шукташ миен толаш темленыт. Мый тидын дене келшенам. Кум тылзе тушто пашам ыштымеке, шочмо кундемышкем пӧртылынам. Тунемын пытараш кӱлын. Но дипломым налмеке, угыч кок тылзылан тушко чоҥештенам.
Тыге эркын калык нерген пален налынам, йылмыштым умыленам, а жап гыч кутырашат тунем шуынам. Миен коштмем нерген социал кыллаште палдаренам. Тидын деч вара йылмым туныкташ йодын возаш тӱҥалыныт. Кумылан-влак пеш шукын ыльыч, садлан курсым эртараш шонен пыштенам. Кызыт теве кудымшо тӱшкам чумыренам.
Программым чыла шкак чоҥенам, кӱлеш видеомат шкак келыштаренам. Тунемаш кажне гана 25-30 (35) еҥым налам. Курс кок арня шуйна. Ты жапыште ме кутыраш тунемына. Мучаште оҥай экзаменым эртарем. Кажне деке посна йыҥгыртем да тудын дене лач турко йылме дене мутланем. Тыге шинчымашышт вигак палдырна.
Шукыж годым йылмым тунемаш 13-45 ияш ӱдыр-ӱдырамаш-влак толыт. Иктыже турко качым верештын, весе тудо элыш тунемаш кайынеже, кумшын – вес шонымаш.
– Тый тыгак SММ-специалист улат. Ты аланыш ушнаш шонышо лудшына-влаклан могай каҥашым пуэт?
– Мый еҥ-влаклан Instagram лаштыклам вияҥдымаште полышым пуэм. Тиде куштылго паша манын шонат, очыни. Пуйто кечыште кок шагат телефонышто шинчетат, витле тӱжем – кӱсеныште. Но тиде йӧршын тыге огыл. Вет SММ-менеджер фотограф, видео оператор, текстым возышо да эше шуко вес сомылым иканаште шуктышо еҥ лийшаш. Тыгак тудо интернетым сайын палышаш. У приложений-влакым шымлышаш.
Сай кӱкшытыш шуаш шонеда гын, тендан деч полышым йодшылан шке ӧрмалгымыдам, лӱдмыдам, иктажым палымыдам ида ончыкто. Шкендам ӱшанлын кучыза, чыла жапыште ышташ тыршыза. Тунам веле пашада лектышан лиеш.
– Instagram деч посна тый TikТok-ышто вияҥат. Тушто 140 тӱжем наре йолташет уло, видеот-влакымат шӱдӧ тӱжем утла еҥ онча.
– Тыге. Тиде сомыл куштылгыжак огыл. Ты социал кылыште тыйым ончышт манын, пеш уста лийман, сай контентым темлыман. Тыштыже мылам пиал шыргыжын: мый шуко еҥ кокла гыч марий ӱдыр улмем дене ойыртемалтам. Шуко йылмым палымемат сай йӧным ыштен.
20 тӱжем наре интернет йолташ лиймеке, шукын поро шомакым возен колтат ыле. Тидыже, мутат уке, куандарен да ончыкыжымат тыршаш таратен. Но подписчик ешаралтме семын, удам возышат шукемыныт. Тиде ойгандара. Но мый тыгай еҥ-влакым лаштыкем гыч кораҥдем. Южгунам возымыштым уждымыла коям.
– Наталья, марий калык нерген интернет гоч палдарымет дене шуко пайдам ыштет. Тек ончыкыжымат ты пашат вораҥын шога. Таза лий.
– Тау!
О.МОШКИНА мутланен
