Кеҥеж каныш гыч лекмеке, М.Шкетан лӱмеш Марий национальный драме театрын коллективше у тургымлан виян ямдылалтеш. Артист ден режиссер-влакын веле огыл, цехлаштат паша шолеш.
104-ше тургым кунам почылтеш да мо дене ӧрыктара? Нине да моло нерген театрын художественный вуйлатышыже, режиссёр Василий ПЕКТЕЕВ дене мутланышна.
– Василий Александрович, тургымым почмо деч ончычат театрыште икмыняр постановкым ончыктеда. Тиде мо дене кылдалтын?
– Сентябрьыште кок спектакльым калык ончыко луктына. 1 сентябрьыште «Ший Пампалче» мюзиклым, а 7 сентябрьыште «Йыван Кырла. Путевка в жизнь» документальный драмым темлена. Кокымшо спектакльжым 12 сентябрьыште Грозный олаште Российысе театр-влакын «Федерация» IV фестивальыштышт ончыктена. А тиддеч вара ме Башкортостан Республикыш чоҥештена. «Кугу гастроль» проект полшымо дене Уфа олаште кӱшнӧ ончыктымо кок спектакльым, тыгак марий калык йомак негызеш ямдылыме «Кум ака-шужар» йомакым ончыктена. Тылеч вара Мишканыште, Калтасаште, Нефтекамскыште да Бирскыште илыше-влаклан «Каша из топора» йомакым да «Ава капитал» спектакльым ончаш темлена.
– У тургым кунам да могай спектакль дене почылтеш?
– 6 октябрьыште Шекспирын «Гамлет» произведенийже почеш «Гамлет. Машина. Цемент» спектакльын премьерже дене почына. Тудым самырык режиссёр Степан Пектеев сценыш луктеш. Спектакльын действийже Марий кундемлан, тачысе жаплан келыштаралтын. Тыгай йӧным кызыт Российысе шуко театрыште кучылтыт. Кодшо тургымышто, мутлан, ме Гогольын «Ревизор» пьесыж почеш «Тергыше» спектакльым сценыш луктынна ыле. Калык шокшын вашлийын, адакшым артист-влакат, поснак Сергей Данилов Хлестаковын, Иван Смирнов Городничийын, тудын пелашыжым Светлана Сандакова, ӱдыржым Светлана Александрова мастарын модыныт, образыш келгын пуреныт. Сергей Даниловын ӱстембаке кӱзен шогалын, олым шӱвырым шокталтен колтымыжак калыклан вучыдымо пӧлек лийын.
Кодшо тургымышто «Тергыше» да тыгак «Торешвате», «Ой, Мичу! Ох, Зина!..» спектакль-влакым сценыште кок-кум гана веле модын шуктенна, сандене нуным калык ончыко уэш луктына.
– У спектакль-влакым куанамрак вучыман?
– 25 августышто Василий Домрачев Цех-залыште «Посадить дерево» спектакльым сценыш луктеш. А октябрь мучашлан Роман Алексеев Анна Богачеван «Китайская бабушка» пьесыж (марлашке Светлана Белкова кусарен – авт.) почеш «Китай кува» комедийым ямдылен шукта. Ӱмаште театр ешыш ушнышо режиссёр Алексей Ямаеват кызыт артист-влак дене репетицийым эртара. Георгий Николаевын «Звездный час по местному времени» произведенийже почеш «Шӱдыран тат» спектакльын премьерже ноябрьыште лийшаш.
Шке возымо «Чачавий» пьесем почеш тыгаяк лӱман спектакльын репетицийжым сентябрь-октябрьыште тӱҥалаш шонем. Калык ончыко тудым У ий деч ончыч лукташ палемдыме.
Тыгак Марий Элын калык артистше Светлана Строганова шкенжым режиссёр семын терген ончынеже. «Волшебная лампа Алладина» музыкальный спектакльжым У ий вашеш ямдылен шуктынеже.
– «Чачавий» дене «Эн сай пьесе» конкурсышкат ушнен улыда вет?
– Туге, ӱмаште алмашлӱм дене конкурсыш пьесым пуэнам ыле, жюри нылымше вер дене палемден. «Чачавий» – тачысе илышлан келшен толшо детектив сынан комедий.
– Тиде спектакльыште тӱҥ рольым кӧмыт модаш тӱҥалыт?
– Спектакльым кок состав дене ямдылаш шонымаш уло. Чачавийын рольжым Светлана Александрова ден Кристина Лебедева модшаш улыт. Но жап ончыкта кӧ пала, калыкыште манмыла, илена да ужына…
– Василий Александрович, йодышем-влаклан вашештымыланда пеш кугу тау! Таза лийза, чыла шонымашда шукталтше.
– Тау тыландат, тенданат чыла сай лийже.
Алевтина БАЙКОВА мутланен
Авторын да театрын архивше гыч налме фото-влак
