Марий Эл правительствын пӧртыштыжӧ Йошкар-Олаште Марий паркым ыштыме йодышым каҥашеныт. Совещанийым Марий Эл виктем вуйлатышын икымше алмаштышыже Михаил Васютин эртарен.
Кодшо ийын «Марий парк» проект «Оласе средам йӧнаным ыштымаш» федеральный программыште эн шуко йӱкым поген да сеҥышыш лектын. Тудын верч 4 тӱжем утла еҥ йӱклен.
Конкурсын йодмашыже почеш, подрядчикым ойырымо, вес регион гыч улшо компаний шошым пашам тӱҥалын, но чоҥымо жапым шуйкален, вара паша йӧршынат чарнен шогалын. Тидым шотыш налын, Йошкар-Ола администраций шке мутшым кучыдымыжлан кӧра подрядчик дене ойпидышым кӱрлаш пунчалын, палемден Михаил Васютин.
Йошкар-Олан мэрже Евгений Маслов умылтарен: подрядчиклан аванс шотеш тӱлымӧ оксам бюджетыш суд гоч пӧртылтат, а пашам августышто вес подрядчик умбакыже шуя.
Марий парк оласе калыклан да уна-влаклан кӱлешан проектлан шотлалтеш, сандене тудым чоҥымо пашам лишыл жапыште уэш тӱҥалман.
«Проектым каҥашыме годым общественностьын еҥже-влак Марий парклан марий сыным пуртымо шотышто ятыр темлымашым ыштеныт, олан Ленин проспектыштыже верланыше ужашыште марий пайремым веле огыл, моло мероприятий-влакымат эртараш вер лиеш. Паркыште идалык мучко чыла ийготан-влак канен кертыт», – палемден Михаил Васютин.
Республик виктем вуйлатышын икымше алмаштышыже чыла юридический йодыш-влакым рашемдаш, чоҥымо пашам эреак тергаш да проектын икымше этапшым тений мучаш марте шукташ палемден каласен.
Марий Эл Республикым вуйлатышын администрацийжынинформаций паша пӧлкажын уверже негызеш Л.СЕМЕНОВА ямдылен
Д.Речкинын фотожо
