9-11 январьыште «ГородаМеняютсяДляНас» федерал проектын ВКонтакте воткылысе официал группыштыжо элнан эн мотор У ий кожшылан йӱклымаш кая.
Марий Эл гыч тушто Волжский районысо Купсола селасе калык «Марий кожым» темлен. Куд метр кӱкшытан ужар кожым ты кундемысе кидмастар-влак сӧрастареныт. Мутлан, марий орнаментан пу арверым Василий Данилов, а национаьный вургеман курчак-влакым шуко шочшан ава Елена Кондратьева ямдыленыт. Тыгак кожышто марий аралтыш, шорык меж гыч сувенир, вӱдуа гыч корзинка-влакым ужаш лиеш.
Тидын нерген Марий Элын Чоҥымо паша, архитектур да илыме вер ден коммунал озанлык министерствыже увертарен. Тудын специалистше-влак марий кожлан сеҥаш полшаш манын, йӱклымашке ушнаш йодыт.
Светлана Носова
Фотом министерствын воткыл лаштыкше гыч налме.
