11-17 сентябрьыште Екатеринбургышто Самырык-влакын тӱнямбал фестивальышт кышкарыште «Тӱня калыкын тамже» гастрономий фестиваль эрта.
Ныл кече жапыште Российын 50 регионжо, тыгак Китай, Сирий, Индий гыч мийыше участник-влак калык кочкышышт дене палдареныт. Ончылгоч увертарыме почеш, 191 эл гыч 10 тӱжем еҥ 20 тӱжем кочкыш ден йӱышым ямдылен. Фестивальын тӱҥ шонымашыже Россий калык-влакын икоян улмо идалыклан пӧлеклалтын. Тудын авторжо – «Российын гастрономий картше» федерал проектым илышыш шыҥдарыше Екатерина Шаповалова.
Марий Эл гычат тушко ресторатор-влак ушненыт. Фестиваль кышкарыште тӱрлӧ калык кочкышым ямдылыме мастер-класс-влакым эртареныт. Мутлан, «Теплая речка» трактирын озашт-влак Юлия ден Иван Антроповмыт ӱячам ышташ, подкогыльым тӱрлаш, Екатерина Кожевникова «Мари» сийгудын коҥгаштыже шӱрашан мелнам кӱэшташ туныктеныт. Марий ресторатор-влак деке унала Россий президентын администрацийжым вуйлатышын икымше алмаштышыже Сергей Кириенко толын кайыме нерген шке воткыл лаштыкыштыже Иван Антропов палдарен. Тудым шӱрашан мелна, подкогыльо дене сийленыт.
Марий кугыжаныш университетын студентше Мохаммад яшмыкпурса (чечевица) гыч шӱрым, тыгак шке калыкшын шере кочкышыжым ямдылаш туныктен.
Фестиваль годым ыштыме эн кугу кочкыш 10 килограмм нелытан чыве шыл когыльо лийшаш. Программе Российын да моло эл гыч чумырымо сборный команде-влакын мелнам кӱэштме конкурс дене мучашлалтшаш.
Светлана Носова
Снимкыште: марий ресторатор-влак Сергей Кириенко дене пырля.
Иван Антроповын воткыл лаштыкше гыч налме фото.




