Рошто кечын Йошкар-Оласе Марий паркыште «Шорыкйол» калык йӱла пайрем гӱжлен эртыш.
Тушко Параньга район Яҥгетсола тӱвыра пӧртын «Ший шымаш» фольклор ансамбльжын участникше-влак толыныт да чылтак ӧрыктарышт. Эн ончыч тӱжвал сынышт дене. Шкеныштым нуно «вувер ӱдыр-влак» улына маньыч гынат, Шорыкйол йӱлам сайын палат улмаш. Пырля кондымо ӱштервоштырышт дене уто-ситым, осалжым-зиянжым, оккӱлжым «почкалтарышт» да У ийыште сайым гына тыланышт. Сценыштат шке усталык койышыштым ончыктышт.
Марий паркыште эртыше Шорыкйол пайремыште тыге весела лиеш манын шоненат омыл. У идалыкым почшо марий кечышот йӱла пайремым республикысе Марий тӱвыра рӱдер Але марте ле марте эре Чарла кремльыште эртарен гын, тений адрес вашталтын. Мо куандарыш, тыште вер утларак келшыше. Кугыеҥ дене пырля толшо икшыве-шамычлан модаш тӱрлӧ йӧн паркыштыжак уло.
Эшежым, моло годым тынар Васли кува ден Васли кугызам ужалтын огыл ыле. Нуно могай гына нуно лийын огытыл! Ончен ӧрым. Мемнан фотографнан пашалаж гоч шкежат тидым ужын кертыда.
Пайрем тӱҥ аллей дене тӱшкан ошкылмаш гыч тӱҥалын. Тиде тыглай ошкылмаш лийын огыл. Лачшымак Васли кува ден кугыза-шамычет тушто лийыныт. Тыгак рӱдоласе ден икмыняр район гыч фольклор ансамбль-влакын участникышт, пырля мурен-куштен, рӱдӧ сцене деке каеныт. «Марий карнавал» манашат лиеш. Варажымат саде Васли кува ден кугыза-влакет уло аланым авалтеныт. Паркыш тыглай ончаш толшо-влакын, тыгай оҥай сӱретым ужын, пайремыш ушнымыштат куандарыш. Йӱлана нерген умылтараш йодшат вашлиялтыч.
Сценыште кажне коллектившым, тыгак посна мурызо-влакым уна семын кинде-шинчал дене пайрем озавате (Мария Ильина) ден озамарий (Сергей Карпов) сийлен колтеныт. Кажне уна шке усталык койышыжым ончыктен. Но тыглай огыл, Шорыкйол пайремын йӱлаж дене кылден. Пайремыште лум каванымат ыштеныт, шуршымат поктеныт, икте-весылан У ийыште чыла сайым тыланен, пӧлекымат кучыктеныт, пӱкш денат сийленыт, тӱрлӧ семын мужедыныт…
Мужедме шотышто: рӱдӧ сцене воктенак портышкемым кышкен, ӱдыр-влак марлан кайышашлыкыштым пален налаш тыршеныт. Эсогыл агытан дене мужедыныт. Весела модышат ситышын лийын. Мутлан, лум дене тич темыме кок ведрам вӱдвараш сакалтен, палемдыме кужытым куржталыныт, тӱшка дене кандырам шупшыныт… «Мари» сийгудын пашаеҥже-влак ты аланыштак коҥга гыч кӱэшт лукмо команмелна да шокшо чай дене сийленыт.
Сай игечылан кӧра калык шуко толын. Пайрем деч вара кӧжӧ икшывышт дене пырля йоча аланыш, кӧжӧ «Тазалык аллейым» ончаш каеныт. Южышт тений шыжым вераҥдыме пу скульптур-влак деке ошкылыныт, нунын пелен шогалын войзалтыныт. Тыгай марий шӱлышан паркна улмылан куанаш гына кодеш. Тудо мемнам, чынжымак, иктеш чумыра.
Светлана Носова
М.Скобелевын фотожо.
