20 ноябрьыште Озаҥ оласе Советский районышто верланыше 93-шо №-ан гимназийыште шочмо йылмым туныктышо-влаклан «Шуко тӱвыран кумдыкышто шочмо йылме: туныктымо да воспитанийым пуымо пашаште кызытсе стратегий ден технологий» регион-влак кокласе конференций эртен. Тушто Марий Эл гыч участник-влак лийыныт.
Тиде Марий образований институтын марий филологий да культурологий кафедржым вуйлатыше Елизавета Игнатьева ден Оршанке район Нужавлак школышто марий йылмым туныктышо Людмила Пирогова (снимкыште).
Конференцийыш марий, чуваш, удмурт да мордва йылмылам туныктышо-влак погыненыт. Нуно пайдале паша опыт, методике могырым полыш шотышто каҥашеныт. Марий образований институтын марий филологий да культурологий кафедрже Елизавета Игнатьеван вуйлатымыж почеш регионласе педагог-шамычлан методике практикумым эртараш тӱҥалеш.
Палашлан, кызыт Татарстан кундемыште марий йылмым 16 общеобразовательный школышто чылаже 888 йоча тунемеш, нуным 14 туныктышо туныкта.
Г.Кожевникова
Фотом Марий образований институтын сайтше гыч налме
