25 апрельыште Россий писатель ушемын Марий Элысе региональный пӧлкажын йыжыҥъеҥже, поэт Альберт Васильевлан 65 ий темын. Морко район Изи Маршан ялеш шочын-кушшо, 26 ий кӱрылтде Советский районысо «Коммунизм верч» колхозышто тӱҥ зоотехниклан ыштыше, марий сылнымут шурнывечыште шке йӱкшӧ дене ойыртемалтше мутмастрлан поэт йолташыже Альбертина Иванова тыгерак возен: «Тыйын серымет марий поэзийыште – чинче!» Тиде – кугу ак.
Пагалыме Альберт Александрович! Лудшына-влак лӱм дене шочмо кечыда дене шокшын саламлена. Тендан деч у деч у почеламутым вучаш тӱҥалына. Таза-эсен лийза!
–Альберт Александрович, можыч, мый йоҥылыш лиям, но туге чучеш, пытартыш жапыште Те шагал возеда, почеламутда-влак шагал печатлалтыт. Амалже могай? Кузе умылтареда?
– Йоҥылыш огыда лий. Пытартыш жапыште чынжымак шагал возем. Но тыгайже ожныжат лийын. Пел ий дене ик корнат возалтын огыл, а вара урылтшо пӱяла ик почеламут почеш весе шочын, кажне кечын гаяк манаш лиеш, южгунам кокыт дене. Кызыт тыге огеш шоч. Шочеш гынат, пеш нелын. Амалже могай, каласаш неле. Южгунам туге чучеш, пуйто мо нерген каласаш шоненам, чыла каласенам, тетла нимо нерген ойлаш, нимо денат нигӧм ӧрыктараш да куандараш. Лиеш докан дежурный манме почеламутым возаш да иктаж-кушко савыкташ. Но ожнысо деч ударакшым еҥ ончыко лукмо ок шу да шкаланем шке палемдыме кӱкшыт гыч волаш сай огыл докан. Южгунам тугай шонымаш шочеш, а кӱлеш мо мыйын возымем иктаж-кӧлан, да улыт мо тудым лудаш кумыланже? Эсогыл тора марий яллаштыжат икшыве моткоч шагал кодын, да нуныжат рушла веле кутырат.
– Поэзий дене таҥлалтмыланда нигунам ӧпкелалтын огыдал? Вет поэт лияш – почеламутым гына возымо шагал…
Л.СЕМЕНОВА мутланен
