«МАРИЙ ЭЛ» ТАЧЕ ЭКОНОМИКЕ

«Марий Элыште ыштыме»

Россий предприниматель кече

«Марий Элыште ыштыме»

Йошкар-Оласе Чарла кремльыште кодшо рушарнян республикыштына сатум ыштен лукшо-влакын «Марий Элыште ыштыме» выставке-ярмиҥгашт эртен да тудо Россий предприниматель кечылан пӧлеклалтше декадым иктешлен.

Декаде кок арня ончыч тӱҥалын. Ты жапыште лийше мероприятий-влак тыгак «Изи да кокла кугытан предпринимательстве» национальный проект дене келшышын  да тӱрлын – ярмиҥга да йыргешке ӱстел воктене каҥашымаш, тренинг да тематике почеш мутланымаш семын – эртаралтыныт.

Шке пашам ыштыше-влак 25 майыште Йошкар-Ола ден Козьмодемьянскыште продукцийышт дене палдарыме ярмиҥгаш ушненыт. Тушто нуно сӧрастарыме насташт, сӱретышт, курчакышт, модышышт, сурткӧргӧ ӱзгарышт дене палдареныт.  Тыгай ярмиҥга нине олаштак кеҥеж мучко каныш кече еда пашам ышташ тӱҥалеш.

А 27 майыште Республикысе курчак театрыште Россий предпринимательстве кече лӱмеш ты пашаште шуко ий тыршен ыштыше-влаклан наградым кучыктымо. Тудым кучыктымо годым республикын промышленность, экономике вияҥмаш да сатулымаш министрже Станислав Крылов палемден: «Марий Элыште изи да кокла кугытан бизнеслан вияҥашыже чыла условийым ыштыме, санденак республикыште ыштен лукмо чумыр продукт гыч 30 наре процентшым лачак тудо пуа. Тиде сай ошкыл!»

2 июньышто декадым иктешлыше «Марий Элыште ыштыме» выставке-ярмиҥгаш промышленный, кочкыш да кидпаша сатум ыштен лукшо-влак погыненыт. Шукыштым ме сайын палена. Но паленаже тӱҥ продукцийышт гоч. Вет нуно моло сатумат ыштен луктыт, моло пашамат шуктат. Теве Марий силикат кермыч завод тӱрлӧ тӱсан кермычым, газосиликат блокым да чоҥымаште кучылтшаш кукшо вартышым лукмо дене пырляк еҥ-влакын йодмышт почеш шкежак пӧртым проектироватла да чоҥен пуа. Але теве Марий машиностроитель завод неле радиотехнический комплексым да виктарыме системым, шотлышо техникым да тӱрлӧ приборым лукшо семын палыме гын, тудын «Санда-М» предприятийже энергийым перегыше светодиод продукцийже дене ойыртемалтеш. Марий искусственный коваште завод (кызыт тудо «Марискож» АО маналтеш) ынде искусственный коваштым веле огыл, тыгак пу шанчаш ден полимер гыч пеҥгыде да чытыше терраслык оҥам ямдыла.

Шернур сыр заводым тымарте сырым да шӧр-торык продукцийым лукшо семын паленна гын, ынде кондитер да косметике изделийже денат калыкым савыра. Республикысе шӧр заводат тыглай продукций дене пырля сырым, тӱрлӧ йогуртым лукташ тӱҥалын. Йошкар-Оласе шыл комбинат ден «Звениговский» шыл комбинатын продукцийыштым республик деч ӧрдыжтат сайын палат, да нуно эре могай-гынат у продукцийым темлат. Сандене нине предприятий-влакын кочкышыштым дегустаций амал дене тамлен ончаш кумылан еҥ шукак ыле. Мӱкшызӧ-влакат шке продукцийыштым шукын луктыныт, мӱйыштым тамлыше да налше-влак лийыныт.

А кидмастарнаже-влак мом гына огыт темле: Красногорский посёлко гыч Валентина Шишкина – тошто тӱрлеман шарпан ден ӱстембал шовычым да тӱрлеманак аралтышым, а Динара Буткевич – оҥа гыч пӱчкеден ыштыме сувенирым, Кужэҥер район Йывансола гыч Анатолий Ефимов – марий аралтыш ден брелокым, матрёшко ден магниткым, а Тошто Йӱледӱр гыч Маргарита Кузнецова – шийдарманым. Йошкар-Ола гыч Антонина Колесникова шкенан кундемыште погымо шуко тӱрлӧ эмлык шудым конден – налыт веле.

Выставке-ярмиҥга эртыме жапыште Республикысе марий тӱвыра рӱдер концерт программым ончыктен. Мурызо ден куштызо-влак шке мастарлыкышт дене куандареныт. Кокла гычак предпринимательстве темылан викторине лийын, сеҥышылан пӧлекым пуэныт. Воктенак йочалан вияҥаш полшышо модышым ыштыше-влак мастер-классым ончыктеныт. Тыге предпринимательствылан пӧлеклалтше пайрем пайдалын да оҥайын эртен.

Юрий ИСАКОВ

Снимкылаште: «Санда-М» ТПК-н специалистше М.Плетнёв; «МЗСК» ЗАО-н инженер-технологшо Г.Амбарцулова; Шернур сыр заводын пашаеҥже-влак; Кужэҥер район гыч кидмастар-влак А.Ефимов ден М.Кузнецова; Марий Элын калык да Российын сулло артисткыже З.Берникова.

Авторын фотожо

Опубликовать в Одноклассники

Добавить комментарий