Тудым вуйлатыше Евгений Кузнецов штаб 600 утла мер эскерышым ямдылен манын каласыш. Нуно республикысе кажне участковый комиссийыште пашаштым шуктат. Штаб почылтмеке, нине эскерыше-шамыч дене увер вигак пурен шогаш тӱҥалын. Штабыште Россий мучко тӱрлӧ регионышто сайлымашын кузе эртымыжым онлайн йӧн полшымо дене ужын кертыт.
Иктаж участкыште умылыдымаш. проблеме лектеш гын, картыште тудо йӧшкар тул дене йӱлаш тӱналеш. Тунам уло штабын ресуршым проблемым пытараш манын кучылтыт. Чыла сай гын, ужар тул йӱла.
Тиде сайлымаште икымше гана дистанционный электрон йӱклымаш эрта. Штабыште тудын кузе кайымыжым кум мер эскерыше тӱткын онча. Штаб сайлымаш эртыме кум кечыштат, 6, 7, 8 сентябрьыште, пашам ышташ тӱналеш.
Лидия ШАБДАРОВА
