2023 ийыште Марий Элыште илыше федеральный льготник-влаклан санаторий да курорт шотан тӧнежлашке 793 путёвкым ойырымо.
Льготник-шамыч регионысо веле огыл, Марий Эл деч ӧрдыжысӧ: Крымысе, Ставрополь крайысе, Сочисе да Самара областьысе санаторийлаштат эмлалтыныт.
Путёвкым социальный услуго наборым натуральный вид дене налше-шамычлан пуат. Санаторийын профильжым врач палемда. Льготник эмлалтме верыш миен-толмо услугымат ойырен налын гын, ончыч санаторий марте, а вара мӧҥгӧ йотке корно роскотым ок ыште.
Путёвкым черет дене ойырат, тудыжо йодмаш ден эмлалтме профильым пуымо кече дене кылдалтын. Черетыште мынярымше улмым Россий Федераций Социальный фондын сайтыштыже регионысо лончышто рашемдаш лиеш.
Санаторий да курорт шотан тӧнежлаште эн шагалже 18 кече эмлалташ йӧн ышталтеш, инвалид йӧча-влаклан – 21 кече, черле, туп ден вуйдорыкым сусыртышо-шамычлан – 24 кече.
Йодмашым Кугыжаныш услуго портал гоч дистанционно але Социальный фондын клиент службыштыжо да МФЦ-ште лично пуаш лиеш. Лекше йодышым рашемдыме телефон – 8-800-200-11-70 (8 гыч 17 шагат марте).
М.ИВАНОВА
Интернет гыч налме фото
