17 октябрь гыч республикыштына информаций технологий арня тӱҥалын. Тений тудо латикымше гана эрта.
Марий Элым вуйлатыше Юрий Зайцевын кӱштымашыж дене келшышын, регионын Образований да науко министерствыже Информаций технологий арнян тӱҥ шонымашыжым палемден: калыкым ИТ-специальность-влак дене палдараш, увер лӱдыкшыдымылык дене кылдалтше йодыш шотышто умылтарымашан пашам шукырак эртараш.
Тыге тиде арняште республикысе тунемме верлаште тӱрлӧ конкурс, ончер-шамыч эртат. Мутлан, Йошкар-Оласе йочасадлаш коштшо-шамыч робототехнике дене моштымашым, а Килемар район Церкысола школышто тунемше-влак квадрокоптерым виктарыме мастарлыкым ончыктат. Иннополис университетын еҥже-шамыч школ ден техникумлаште шинчымашым погышо-влаклан мастер-классым эртарат, Роскомнадзор виктем интернет сетьыште лӱдыкшыдымылык правил дене палдара, Политехнический лицей-интернатысе «ИТ-куб» рӱдерын командыже Советский район Вечын школын тунемше ден туныктышыжо-влак дене вашлиймашым эртара. Чыла тидын нерген республикын Образовательный порталыштыже увертарыме.
Г.Кожевникова
