Кеҥеж кыдалне кажне суртоза телылан шапашым ямдыла. Иктышт тӱрлӧ саскам поген, вареньым шолтат, а весышт пакчаште ончен-куштымо саскаштым шинчалтат, консервироватлат. Южышт теве поҥгымат поген толыт, мариноватлат. Марий мурызо, артист-влак телылан мом ямдылаш йӧратат?
Нина Макарова, Российын сулло артистше:
— Пытартыш жапыште таза илыш-йӱлам кучаш тыршем, сандене нимом ом консервироватле. Садыштем тӱрлӧ емыж, саска кушкеш. Нуным поген, сокым ыштем да идалык мучко йӱашна сита.
Алина Егошина, Марий Элын сулло артистше:
— Отпускыш лекмеке, икымше кечынак йошкар да шем шоптыр дене латкуд банке компотым ыштенам. Но тиде – тӱҥалтыш веле. Киярым шинчалтыме, поҥгым поген, мариноватлыме, салатым монь ыштылме паша эше ончылно вуча.
Ольга Федотова, Олык Ипай лӱмеш Кугыжаныш молодёжный премийын лауреатше:
— Кеҥеж телым пукша, — маныт калыкыште. Сандене пӱртӱсын поянлыкше дене пайдаланен, телылан сайынак ямдылалташ тыршем: чодырасе емыжым, сакыр дене варен, кылмыктыме камерыш пыштем. Тутло емыж телым мелна дене моткоч тамле! Тыгак тӱрлӧ салатым, вареньымат шолтем. Ешем мариноватлыме помидорым да киярым моткоч йӧрата. Тудым ямдылаш банкыш оптем: 1литран банкыш пыштем: 1чеснок пӱйым, 3 пырче пурсам, лавр лышташым, 1,5 совла сакырложашым, 0,5 совла шинчалым да ӱмбакышт киярым. Йӱштӧ вӱдым темем да стерилизоватлаш шындем. Кияр оливке тӱсым налаш тӱҥалешат 1чай совла 70%-ан уксусым ешарем. Тыгай рецепт дене ямдылыме кочкыш моткоч тутло да писын ышталтеш, адакшым лишыл йолташем-влакланат пеш келша.
А.Байкова.
