Пытартыш жапыште Марий Элын Социальный вияҥмаш министерствышкыже цифровой приставкым налме шотышто йодын толшо палынак шукемын. Тидын дене келшышын спутник телевиденийын каналже-влакым кучышо оборудованийым але цифровой эфир телевиденийын каналже-шамычым кучышо телевизионный приёмникым налме роскотлан компенсацийым ойырымо радамым умылтарена.
2019 ий июнь гыч Марий Эл тичмашнек цифровой эфир телевещанийыш кусна. Тудын полшымыж дене калык йӱк да сӱрет шотышто палынак сай качестван шуко телеканалым ончаш тӱҥалеш. Но тидланже у телевизорым але цифровой тюнерым, чыла толкыным кучышо антенным налаш кӱлеш, вет аналоговый телевещанийым йӧршешлан йӧртат.
Кызытсе жаплан келшыше чыла гаяк телевизор DVB-Т2 цифровой стандарт дене пашам ышта. Тыгай техникылан приставкым налаш кӱлешыже уке, тудым антенне дене ушаш да канал-влакым кычалаш гына кодеш.
А теве тошто телевизорым ончышо-шамычлан специальный приставкым налаш логалеш. Илыме вер мланде ӱмбалнысе эфир цифровой трансляций сеть деч ӧрдыжтӧ гын, DVB-Т2 стандартан спутник телевидений кӱлеш.
Цифровой сигналым кучышо оборудованийын роскотшым Марий Элыште илыше шуко шочшан еш-влаклан пӧртылтат. Тыгодым оборудований 2019 ий 1 январь деч вара налме, тиде жаплан ешын «шуко шочшан еш» статусшо да икшывылан пособийже лийшаш.
«Цифровой эфир телевиденийын авалтыме кумдыкыштыжо илыше еш-влаклан телевизорлан приставкым, шуко толкыным кучышо антенным, телевизионный приёмникым налмыжлан 1500 теҥге марте тӱлен кертына, но тичмаш роскот деч шуко огыл, – умылтарат министерствыште. – Телепрограмме-шамычым ончаш кӱлшӧ ресивер ден спутник тарелкым налше-влакланат 1500 теҥге марте тӱлаш ямде улына. Тидланже оборудованийым ончыч шке кӱшеш налман. Вара ик гана тӱлыман окса компенсацийлан ача-ава кокла гыч иктыжлан калыклан социально полшымо верысе рӱдерыш 2019 ий 30 сентябрь йотке мийыман, пелен йодмашым, шуко шочшан еш улмым пеҥгыдемдыше документым да цифровой сигналым кучышо оборудованийын квитанцийжым кондыман».
Шуко шочшан еш-влаклан компенсацийым ойырымо процедурым лийме семын куштылемдыме, молан манаш гын тудын ик йодмашыжлан икшывылан тылзе еда тӱлымӧ пособий шотлалтеш. Ешын доходшо нерген документ огеш кӱл.
Тылеч посна Марий Элыште граждан-шамычлан кугыжаныш социальный полыш пуалтеш. Тудым илен лекташ лийме кугыт деч шагал доходан нужна еш ден шкет еҥ-влак налын кертыт.
Кугыжаныш социальный полыш илен лекташ лийме кугыт гыч шотлен лукмо процент семын идалыкыште ик гана ойыралтеш. Тудым еш ден граждан-влак шонымо семын, ты шотыштак цифровой оборудованийлан кучылтын кертыт.
М.ИВАНОВА.
