Таче Марий Элыште туризм отрасль сайын вияҥеш манаш лиеш. Кундемнан ойыртемалтше сынжым ончал савырнаш шонымаш дене турист-влак шукын толыт. Нуно ик кечылан веле огыл, а икмыняр кечыланак тыште илаш кодышт манын шуко ышталтеш. Пытартыш жапыште гына Йошкар-Олаштына кызытсе жаплан келшыше икмыняр у унагудо шке омсажым почын. А верлаште экотуризмын у видшым вияҥдаш тӱҥалыныт, илаш йӧнан глемпинг-влакым нӧлтат.
Ик эн ончыч тудым Юрино посёлко пелен, Юл эҥер воктене нӧлтышт. Тиде – А буква гай койшо оралте-влак, леведышышт мланде марте шуэш. Тушто телымат илаш чыла йӧн уло: лопка кровать, кухньо, мушкылтмо пӧлем, каминан зал, патио да тулеч моло.
Шукерте огыл тыгайрак сынан глемпингым Звенигово районысо Выльыпсола ялыште почыныт. Туроператор-влакым тудым ончыкташ лӱмын намиен коштыктышт. Турист-влакым вашлияш ямдылыме изирак пӧрт сынан оралтылаште тыгак чыла уло. Нуно вӱд воктене, моткоч сылне верыште верланеныт.
Кокшайск посёлкыштат у тыгай глемпинг почылтын. Тачысе кечылан тушто шым изи пӧртым нӧлтен шындыме. Чыла тиде вашталтыш куандарыде огеш керт, турист-влакым веле огыл, республикыште да Йошкар-Олаште илыше калыкымат. Пошкудо Татарстан, Чуваший вел гыч тышке канаш кудалыштшыжым ойлыманат огыл, поснак кеҥеж пагытыште тӱрлӧ эҥер, ер серлаште канаш йӧратыше-влакым. Шукынжо каныме базылаште улшо шулдо акан изи пӧртлашке путёвкым ончылгочак наледат. Но тыгай изи пӧртлаже совет жапыштак ыштен шындыме улыт. Эшежым нуным огытат олмыкто гай чучеш. А тыгай базыже ситышын, Кокшайскыштак икмынярым ончыкташ лиеш. Мутлан, тений Щучье ер серысе тыгай базыште лияш логале. Оксажым чыла услугылан кӱрыт, но саде пӧртшӧ-влакын тӱжвал да кӧргӧ сыныштым шотыш кондаш лиеш ыле, очыни. Мутат уке, улыт шергыракын шогышо сай пӧртшат.
Республикыште тачысе кечылан мыняр глемпинг улмым шерын лекмек, тыгайрак сынанжым кандашым верештым. Мутлан, Звенигово районысо Какшамарийыште, Волжский район Сотнурышто… Медведево районышто верланышыже «Оланга – Оазис на планете» маналтеш. Тудын соцкыл лаштыкыштыже эсогыл тыге серыме: «Вӱдыштӧ шогышо тыгай глемпинг Российыште икте гына». Тидлан куаныман веле, Марий Элыштына илыше-влак, пӱртӱс поянлыкшылан эҥертен, туризмым вияҥден, шийвундым ыштен налаш тунем шуыныт.
Кызытсе жаплан келшыше, чыла шотыштат йӧнан тыгай глемпинглаште чынжымак каныме шуэш. Таклан огыл шомакшак англичан йылме гыч «гламурный лагерь» семын кусаралтеш. Канен илаш чыла йӧн ышталтеш, йырымваш мотор пӱртӱс, нимогай машина йӱк монь уке, эр ден кас ӱжарам вашлийын ужатет. Кумылым нӧлташ мончашкат пуртат, эҥер дене сплавышкат наҥгаят, колымат кучаш йӧным ыштат – оксат гына лийже.
Марий кундемнам йӧратыше, калыкнам пагалыше еҥ семын икте гына шоналташ тарата: молан южо глемпингын лӱмжӧ йӧршеш умылаш лийдыме йот йылме ойсавыртышан улыт: «Бард Вилладж», «Мари Холидей Вилладж», «Маривил»?.. Лиеш вет умылаш лийшын лӱмдаш.
Светлана Носова
Снимкыште: Кокшайскысе глемпингыште.
Фотом «Туризм в Марий Эл» соцкыл лаштык гыч налме.
