11 августышто, Йошкар-Олан шочмо кечыжым палемдыме кечын, Мари паркыште «Ёшка еш» гастрономий фестиваль лиеш.
Тений ты мероприятийлан у площадкым ойыреныт. Организатор-влак тудым «Российын гастрономий картышкыже» пурташ шоненак, тудым эртарат. Санденак тушко общественный шонымашын лидерже, блогер, йот журналист-влакым Куба, Венесуэла, Армений, Вьетнам, Белоруссий, Турций, Казахстан да моло эл гыч ӱжыныт. Эшежым ты кечынак Мари паркыште ятыр моло оҥай мероприятият эртышаш улыт.
9-12 августышто Марий Элыш тыгак Межэтнический журналист гильдийын «О стране с любовью» проектше почеш Красноярский, Краснодарский крайла, Чуваш республике, Москва гыч этноблогер-влак «Европын пытартыш язычникше-влакын» илыш йӱлашт, тӱвырашт дене палыме лийыт. Нуно Йошкар-Олан 440 ияш шочмо кечыжым палемдыме мероприятийлаште, республикын икмыняр районыштыжо лийыт, кревед-влак дене вашлийыт.
Россий президент грант фондын полшымыж дене илышыш шыҥдаралтше ты проектын тӱҥ шонымашыже – самырык-шамычлан келшыше этнокультурный видеоконтентым ышташ да тудым блог-платформылаште шараш.
– Ме пырля путешествоватлена веле огыл, иквереш пеш кӱлешан да сай пашам шуктена: самырык-влаклан умылаш лийше йылме дене сотемдарена. Эн тӱҥ задачына тыгай: Российысе интернет-кумдыкышто калык-влакын икоян улмышт, келшен илымышт нерген палдарыше блогер-просветитель-влакын сообществыштым ышташ. Кажне регионын ойртемалтмыж нерген моштен палдараш – куштылгыжак огыл, – ойла Межэтнический журналистике гильдийын президентше, «Национальный акцент» каналын еҥже Маргарита Лянге.
Ончыктен кодыман, Марий Эл – проектын эртыме икымше верже. Август-октябрьыште тыгаяк тур-влак Астрахань областьыште, Камчаткыште, Самара ден Иваново областьлаште, Мордовийыште эртат. Проект илышыш шыҥдаралтме жапыште Российыште илыше калык-влак нерген чылаже 300 наре просветительский видео ышталтшаш, ты контент интернет-платформылаште 9 миллион просмортым погышаш.
С.Носова
Снимкыште: этноблогер-влак.
Фотом республикысе Калык усталык рӱдерын лаштыкше гыч налме.
