Марий Образований институт пелен ончыкыжым лач тыгай клубым почаш палемдыме. Тидын нерген эртыше кугарнян Марий Эл Образований да науко министерствыште эртаралтше пресс-конференцийыште увертареныт. Ты кечын тушко журналист-влак дене вашлиймашке тений Россий кӱкшытан профессионал мастарлык конкурслаште усталыкым ончыктышо-влак погыненыт ыле.
– «Марий Элын идалыкын туныктышыжо» клубыш ме тыгай конкурслаште сеҥыше ден лауреат-шамычым чумыраш шонена. Кызытлан тушко 2006 ий гыч тӱҥалын тенийысе марте туныктышо ден воспитатель-шамычым погенна. Паша планым шке ыштена. Тыгак педагогический «десантым» ямдылаш шонена, тудыжо районлаш лектын кошташ да конкурсант-влакым муниципалитет кӱкшыт гычак ямдылаш полшаш тӱҥалеш. Тыге ме конкурсант-влакын моштымашыштым ончылгочак аклен кертына да тудым кӱлеш семын виктарен кертына, – каласен пресс-конференцийым эртарыше Марий образований институтын туныктымо-методике паша шотышто проректоржо Ирина Кропотова.
Вашлиймаш годым тудо сеҥыше ден лауреат-влаклан блиц-йодыштмашым эртарен. Уста туныктышо-влак тудын да журналист-влакын йодышыштлан кажныже чон почын вашештен. Теве нунын лӱмышт:
– Татьяна Жидко – Волжск оласе 4-ше №-ан школышто географийым туныктышо, Россий кӱкшытан «Идалыкын туныктышыжо-2022» конкурсын участникше;
– Наталья Петухова – Оршанкысе «Рожничок» йочасадын педагог-психологшо, «Российын идалыкын воспитательже-2022» конкурсын участникше;
– Роза Богомолова – Советский посёлкысо 3-шо №-ан школышто кугыжаныш марий йылмым да ИКН-ым туныктышо, Россий кӱкшытан «Марий йылмым да литературым эн сайын туныктышо-2022» конкурсын участникше;
– Лала Домрачева – Йошкар-Оласе сервис технологий техникумын туныктышыжо, тений «Идалыкын мастерже» всероссийский конкурсын финалистше;
– Елена Ерофеева – Козьмодемьянск школ-интернатын туныктышо-логопедше, «Идалыкын дефектологшо-2022» всероссийский конкурсышто «Идалыкын логопедше» номинацийыште лауреат;
– Игорь Суринов – Семёновко школ-интернатышто изобразительный искусство дене туныктышо, Россий кӱкшытан конкурсышто «Идалыкын дефектологшо» номинацийыште сеҥыше.
Палашлан, таче Марий Элыште чылаже 5 тӱжем утла туныктышо пашам ышта. Нунын профессионал пайремышт вашеш Маристат общий образований сфере дене кылдалтше данныйым савыктен. Педагог-влак кокла гыч эн шукыжо руш йылмым да литературым, математикым, йот йылмылам туныктышо-влак улыт, а эн шагал – информатике, географий да биологий предметла дене шинчымашым пуышо-шамыч. Туныктышын кечыжым 1994 ий гыч палемдаш тӱҥалме.
Г.Кожевникова
Авторын фотожо
