Йошкар-Ола администрацийын ола озанлык управленийже «Мемнан илыме олана» конкурсым иктешлен. Тушко рӱдола кундем кӱкшытан йодышым решатлыме шотышто верысе инициативым илышыш пуртымаште калыкын чулымлыкшым да социальный активностьшым вияҥдыме дене кылдалтше куд проект темлалтын ыле.
Конкурс кок йыжыҥ дене эртен. Икымшыште эксперт совет темлыме материал-влакын, проектлам окса дене пеҥгыдемдыме расчетын чын улмыштым терген лектын. Чыла проектым чынлан шотлымеке, кокымшо йыжыҥыш кусареныт. Тыштыже конкурсыш ушнышо-влак шке проектышт дене палымым ыштеныт. Эксперт совет эн сайжым ойырен налын.
Икымше верыш «Нолька, 2» ТОС-ын Нолька поселкысо рӱдӧ уремым волгалтарыме шотышто проектше лектын. «Эшкинин, 2» ТОС-ын экопарковкым тӱзатымаш дене кылдалтше темлымашыже кокымшо, «Первомайский» ТОС-ын «Лӱдыкшыдымӧ кудывече» проектше кумшо лийыныт. Сеҥышыш лекше -влак чумыржо 580 тӱжем теҥге грантым налыт. Нунылан награде оксам олан бюджетше гыч ойырат.
Вуйым корштарыше йодыш
Олан администрацийыштыже ийготшудымо-влак коклаште правам пудыртымым кораҥдыме шотышто мутланымаш лийын.
Тушко погынышо образований, полиций, наркодиспансер, медицине, паша вер, социальный полыш рӱдерла, культур, наказанийым шуктышо службо пашаеҥ-влак палемденыт: кажне тунемме ий тӱҥалтыште олаште вуешшудымо-шамыч коклаште правам пудыртымаш ешаралтеш. Правам аралыше-влакын мутышт почеш, тидыже тунемше ден студент-шамычын тунемаш тӱҥалмышт, ӧрдыж верла гыч толшо рвезе ден ӱдыр-влакын ола илышлан тунем шудымышт дене кылдалтын.
Совещанийыште рашемын: тачысе кечылан Йошкар-Олаште 18 ияш марте 54800 наре йоча ден подростко илат, а нунын дене кылдалтше йодыш дене улыжат ийготшудымо-влакын пашашт шотышто комиссийын кок секретарьже ышта. Сандене нуным ешарыме нерген ой лектын.
Уым шындат, тоштым рончат
Кодшо кечылаште Хасанов ден К.Маркс уремла ушнымо савыртышыште йолешке-влакын вончымыштым шижтарыше у корно знакым шогалтеныт.
«Сигнал» муниципальный предприятийын специалистше-влак, сай кече толмо дене пайдаланен, тыгак асфальтысе ош палым уэмденыт. Палемдыман: чыла ты вашталтыш тиде кундемыште илыше еҥ-влакын йодмышт почеш ышталтын. Лишыл жапыште тыгаяк корно знак Фестивальный уремыште 64-ше №-ан пӧрт воктене лиеш.
А теве кодшо арня кыдалне рӱдолан коммунальный озанлык службыжо Ленин проспектын 54-ше №-ан пӧртшӧ воктене йолешке-влаклан автомашина корныш лекташ чаракым ыштыше кӱртньӧ ората ужашым ронченыт. Тоштемше да рӱдаҥше конструкцийым кораҥдыдежат ок лий, молан манаш гын тораштак огыл тунемме заведений верланен, эртен коштшо йоча ден подростко-влаклан азапыш логал кертме лӱдыкшым луктеш.
А.АНДРЕЕВ.
