Марий Эл вуйлатышын обязанностьшым жаплан шуктышо Юрий Зайцев «Знание» обществын икымше просветитель модмашын финалистше-влак дене вашлийын: Марий Эл гыч школлаште тунемше-влакын командыже Российысе 88 команде коклаште 13 верым сеҥен налын.
Интеллектуал-спорт таҥасымаште республикнан чапшым 6 ӱдыр-рвезе арален. Нунын лӱмышт – София Свечихина (Экономико-правовой гимназийын 10-шо «Б» классыштыже тунемше), Елена Штурмина (Йошкар-Оласе 19-ше №-ан школ, 10-шо «А» класс), Екатерина Киртаева (рӱдоласе 11-ше №-ан лицей, 9-ше «Б» класс), Степан Перминов (Йошкар-Оласе А.С.Пушкин лӱмеш 4-ше №-ан гимназий, 10-шо «Б», класс), Родион Ямбарцев ден Рания Ганеева (Марий Турек район Нартас школ, 10-шо класс).
«Тендан верч куанем. Келге шинчымашан улмыдам регионыштат, федерал кӱкшытыштат сайын ончыктенда. Эртыше интеллектуал-спорт таҥасымаш-шамыч тендан кокла гыч кажныжлан тӱрлӧ задачым решатлымаште шкем тергаш, шкет да команде дене пырля пашам ышташ, шкан уым пален налаш йӧн лийын – чыла тиде тендам илышыште эшеат виянракым ыштен», – палемден Юрий Зайцев.
Вашлиймашыште йоча-влак мероприятий, Москваште лиймышт нерген каласкаленыт, шонымашыштым ойленыт.
«Тыгай модмаште лиймылан моткоч куаненам. Оҥай ыле, шуко уым пален налынам. Мероприятийым сайын организоватленыт. Вологда область, Сахалин, Мордовий гыч команде-шамыч дене палыме лийынна. Кызыт ме нунын дене социальный сетьла гоч кылым кучена», – каласен Родион Ямбарцев.
«Знание» обществын икымше просветитель модмашыже-влак Москваште кум кече эртеныт. Икымше кечын финалист-влак тӱрлӧ областьла дене кылдалтше йодышлан поян викториныште шинчымашым тергеныт. Кокымшо кечын кажне команде инноваций проектшылан презентацийым ыштен, а кумшышто киберспорт дене первенстве верч кучедалыныт.
Регионым вуйлатышын обязанностьшым жаплан шуктышо кажне тунемшылан «Кванторум» технопаркын проект сессийлашкыже сертификатым кучыктен.
Марий Эл Республикым вуйлатышын организаций да аналитике виктемжын уверже негызеш Г.Кожевникова ямдылен.
