Йолташ-влак, тендан полшымо дене кодшо арняште мурызо-шамыч коклаштышт тыгайрак «тошкалтышым» чоҥеныт.
- Станислав Шакиров – «Тый пӧртылат»
- Володя Матвеев – «Шочмо кече»
- «Шӱм куан» ансамбль – «Таче мураш тӱҥалына»
- Наталия Алексеева – «Лий эҥертыш мыланем»
- Геннадий Васильев, Таисия Смирнова – «Ах, могай улат улмаш»
- Людмила Конакова – «Шарнымаш»
- Надежда Степанова, Александр Веткин – «Вучем»
- «Какшан сем» ансамбль – «Огеш лий мондаш»
- Алексей Пуртов – «Чукайлан»
- Валерий Павлов – «Нигунам ом мондо сылне жапым»
Йӧратыме мурызыланда ончыл верым налашыже кузе полшышашым огыда пале гын, ушештарена: 5533 кӱчык номерыш SMS-ым колтыман. Тӱҥалтыште МАРИ мутым возыман, вара, яра верым кодыде, мурын номержым шындыман. Муро лӱмым кавычкыш налман огыл. Йӱклымаш SMS-ПОРТАЛ-ыште кая.
Волжский район Отымбал ялын шочшыжо Володя Матвеев эстраде аланыште коло ий наре сылне йӱкшӧ дене калыкым куандара.
– Репертуарыштем шочмо кече нерген муро уке, садлан ты волгыдо ош тӱняш толмылан пӧлеклалтше лыжга мурым шукерте огыл калык ончыко луктым. Мутшым шке келыштаренам, а семжым Сергей Пчёлкин возен, – палдара мурызо. – Шочмо кечыш але лӱмгечыш калыкын ӱжмыж почеш мийымеке, уна-влаклан келшен толшо ятыр мурем уло, тыгак тыланымаш семын «Ит чаре» мурем йоҥгалтарем. Весат оҥайын шарналтеш: Волжский район Порат селаште эртаралтше юбилейыште ик мурым шым гана мураш йодыныт! Пайремын озаже Наташа акайлан «Шыже мурем» моткоч келша.
Алевтина БАЙКОВА
Адель Галямовын фотожо
