Кодшо кечылаште Марий Элыш 1 каналын съёмочный группыжо толын. Тудо республикна нерген «Жизнь своих» передачылан сюжетым ямдыла.
Телефон дене мутланыме годым программын продюсерже Елена Маркелова палдарыш: передачылан съемкым Йошкар-Олаште, Козьмодемьянскыште, Курыкмарий, Медведево, Шернур, Морко районлаште ышташ тӱҥалыт. Рашрак каласаш гын, Йошкар-Олан сылне верлажым, илыме комплексым чоҥымым сниматлат, «Паллада» йоча парус клубыш, «Лукоз» каза фермыш, Унчо, Тумер, Кугу Ноля яллашке миен толаш да кидмастар, ойыртемалтше еҥ-влак дене вашлияш палемденыт.
Съёмко кузе кайыме нерген, тыгак «Жизнь своих» передачын вӱдышыжӧ Евгений Кривцов дене вашмутланымашым лишыл номерыште лудаш темлена.
Л.Камалетдинова